Për shkak të motit të paqëndrueshëm, në Portin e Durrësit sot ka prani të reshjeve të shiut, shoqëruar me erë të fortë nga kuadrati i jugut. Era gjatë 24 orëve të fundit ka arritur në 22 m/s, ndërsa sasia e deritanishme e reshjeve ka arritur në 28 mm, shoqëruar me temperatura në minimumin e tyre 7 gradë celcius dhe maksimum prej rreth 14 gradë.
Autoriteti Portual Durrës bën të ditur se, era do të vijojë të jetë prezente në pjesën e parë të ditës, me shpejtësi deri 15 m/s. Në pjesën e dytë pritet rënie e intensitetit të saj.
Valëzimi në det arrin deri në 6-7. Kushtet e motit kanë ndikuar në nisjen e trageteve drejt Barit me disa orë me vonesë, përkatësisht “Af Francesca” nisur në orën 02:35 dhe “Rigel VII” nisur drejt Barit në orën 02:50. Ndërsa nuk janë krijuar vonesa në mbërritjen e trageteve në portin e Durrësit, të dy tragetet e linjës Bari-Durrës janë akostuar në oraret e parashikuara. Procesi i përpunimit të mallrave vijon pa problem.
Përkeqësimi i kushteve meteorologjike në Gjirin e Vlorës po pezullon lundrimin e mjeteve të vogla dhe atyre të peshkimit.
Bazuar në parashikimin lidhur me situatën hidrometeorologjike të përkeqësuar në Gjirin e Vlorës dhe jashtë saj për ditën e sotme do të jetë në drejtimin JUG-JUGPERENDIM në forcën 4-5bft 08-10m/s brenda Gjirit të Vlorës dhe jashtë Gjirit të Vlorës në forcën 6-7bft 10-17m/s me lartësi dallge nga 1.50 deri 2.50 metra.
Sipas Kapitenerisë, përmirësimi i situatës meteorologjike të përkeqësuar në gjirin e Vlorës dhe jashtë saj për mjetet e vogla lundruese dhe të peshkimit do të nisë nga ora 16:00 e pasdites së sotme.