Në cilësinë e negociatorit me opozitën për zgjedhjen e Presidentit të Republikës, deputeti demokrat, Luçiano Boçi reagoi sot në lidhje me qëndrimin e Enkelejd Alibeajt. Boçi shprehet se “grupi parlamentar i PD-së, nuk ka miratuar asnjë dokument kriteresh apo procedurë”.
PD ka miratuar rezolutën për zgjedhjen e Presidentit në Këshillin Kombëtar. Çdo përpjekje e Alibeajt për të paraqitur një opozitë false të emëruar nga Rama-Balla, nuk pranohet.
Kjo e folura dhe paraqitja e vendimeve personale në emër të grupit parlamentar të PD-së përpos që është qesharake, mbetet një hile bajate, për të marrë atribute të paqena dhe për të mbajtur gjallë një përçarje që dihet se kujt i shërben.
Grupi Parlamentar i PD nuk ka miratuar asnjë dokument kriteresh apo procedurë për zgjedhjen e Presidentit, siç e paraqet Alibeaj. Nuk ka pasur as vendim të kryesisë së grupit parlamentar, as mbledhje të grupit, as takim me kuorum për ta quajtur mbledhje grupi dhe as dakordësi në takimet pa kuorum.
Ky lloj keqpërdorimi i sinqeritetit dhe dëshirës së deputetëve të PD-së për të negociuar dhe propozuar Presidentin duhet të marrë fund. PD ka organet e saj vendimmarrëse dhe ka miratuar rezolutën për zgjedhjen e Presidentit në Këshillin Kombëtar. Grupi parlamentar është i unifikuar në idenë që është opozita ajo që duhet të propozojë. Çdo përpjekje e Alibeajt për të paraqitur një opozitë false të emëruar nga Rama-Balla për të shpëtuar faqen e Ramës faqe botës, nuk pranohet! Ne do të vazhdojmë misionin e PD-së për të përafruar qëndrimet për procesin dhe emrin me të gjithë partitë opozitare në nivel politik e parlamentar.
Kryetari i grupit demokrat Alibeaj deklaroi se “presidenti duhet antikomunist”. Alibeaj u shpreh se “e rëndësishme është që në fillim të përcaktohen kriteret”. Në lidhje me pyetjen e gazetarëve se: çfarë tagri keni ju kur janë caktuar Luçiano Boçi e Oerd Bylykbashi për të negociuar, theksoi se “grupi është mbledhur disa herë e gjithësecili pati mundësinë për të shprehur opinionin”. “Kjo është çështje e tejkaluar”, – tha Alibeaj.
