Ish-presidenti brazilian Jair Bolsonaro u lirua së fundmi nga spitali ku ishte shtruar një ditë më parë për shkak të të vjellave, marramendjes dhe presionit të ulët të gjakut. Gjendja shëndetësore e Bolsonaros është përmirësuar, por ai do të vazhdojë të marrë kujdes pasues, shtoi Spitali DF Star i Brasilias. Ish-presidenti kishte shkuar në spital të dielën për të hequr lezione të lëkurës.
Por testet zbuluan praninë e karcinomës së qelizave skuamoze, sipas spitalit dhe Bolsonaro do të ketë nevojë për kontrolle rutinë. “Testet treguan se dy nga lezionet ishin një lloj i hershëm i kancerit të lëkurës”, u tha gazetarëve mjeku i Bolsonaros, Claudio Birolini. “Kjo është trajtuar tashmë përmes heqjes, por kërkohet monitorim i rregullt për t’u siguruar që të mos shfaqen lezione të reja dhe që heqjet të jenë të plota”. Bolsonaro u dënua javën e kaluar nga një panel i Gjykatës Supreme me 27 vjet e tre muaj burg për komplotimin e një grushti shteti pasi humbi zgjedhjet e vitit 2022.
Gjykatësja Carmen Lucia ishte vota e tretë që mundësoi arritjen e shumicës në mesin e pesë gjykatësve duke e gjetur udhëheqësin e krahut të djathtë “fajtor” për komplot për grusht shteti, pasi ai humbi zgjedhjet përballë rivalit Luiz Inacio Lula Da Silva. Megjithatë, vendimi ndaj Bolsonaros, 70 vjeç do të bëhet përfundimtar vetëm atëherë kur edhe gjyqtari i pestë të japë mendimin e tij. Ish-kapiteni i ushtrisë mund të përballet me një dënim me burgim me më shumë se 40 vjet nëse gjendet fajtor për pesë akuzat, përfshirë drejtimin e një “organizate kriminale” si dhe për komplot për rrëzimin e presidentit aktual, Lula.
