Një nga skenat më të komentuara të sezonit të tretë të serialit “House of the Dragon” ka shkaktuar reagime të shumta mes fansave, ndërsa vetë aktori Ewan Mitchell ka pranuar se momenti i puthjes mes personazhit të tij, Aemond Targaryen, dhe nënës së tij Alicent, ishte po aq tronditës edhe për të.
Aktori britanik, i cili interpreton Aemond Targaryen në serialin e suksesshëm të HBO-së, tregoi se reagimi i tij i parë kur lexoi skenarin ishte habi e madhe.
Kur e lexova për herë të parë në skenar, mendova: ‘Kjo është diçka vërtet e pazakontë’. Ishte një moment shumë i fortë
-ka deklaruar Mitchell gjatë një interviste.
Skena, e cila përfshin një puthje mes Aemond dhe Alicent Hightower, e interpretuar nga Olivia Cooke, ka shkaktuar debat të madh në rrjetet sociale, duke u konsideruar nga shumë shikues si një nga momentet më të sikletshme dhe më tronditëse në historinë e serialit.
Vetë Mitchell e ka përshkruar Aemondin si një personazh me plagë të thella emocionale dhe një perceptim të shtrembëruar të dashurisë dhe afeksionit. Sipas aktorit, personazhi i tij ka kaluar një fëmijëri të vështirë dhe kërkon vazhdimisht pranim dhe dashuri, gjë që ndikon në sjelljet e tij.
Edhe Olivia Cooke, e cila luan rolin e Alicent, e përshkroi momentin si “shokues” dhe theksoi se personazhi i saj e përjeton atë me tmerr dhe hutim. Aktorja pranoi se xhirimi i skenës ishte emocionalisht i vështirë për të dy.
Mitchell shtoi se Aemond e sheh veten si figurën e re dominuese të familjes dhe se kjo skenë tregon gjendjen e tij të brendshme dhe krizën emocionale që po përjeton. Sipas tij, momenti lë të hapura shumë pyetje për marrëdhënien mes nënës dhe djalit në episodet e ardhshme.
Pavarësisht reagimeve të forta, krijuesit e serialit kanë mbrojtur skenën, duke argumentuar se ajo shërben për të treguar traumat, vetminë dhe problemet psikologjike të Aemondit, një prej personazheve më kompleksë të universit të “House of the Dragon”.
