Një shpërthim tronditi terminalin kryesor të eksportit të gazit natyror të Katarit të dielën në mbrëmje, ndërsa punëtorët po përpiqeshin të rifillonin veprimtarinë pasi bombardimeve nga Irani. Shpërthimi shkaktoi një zjarr që plagosi të paktën 54 persona, ndërsa 18 të tjerë rezultonin ende të zhdukur disa orë më vonë.
Shpërthimi në zonën industriale Ras Laffan mund të sjellë kaos të mëtejshëm në tregjet globale të energjisë, veçanërisht pasi Katari mbetet një nga prodhuesit më të mëdhenj të gazit natyror në botë. Katari e kishte ndërprerë prodhimin pasi kontrolli i Iranit mbi Ngushticën e Hormuzit e kishte penguar nxjerrjen e dërgesave drejt klientëve të tij.
Ndërsa Irani po lehtësonte kontrollin e tij mbi ngushticën dhe negociatat për një fund të përhershëm të luftës po vazhdonin, Katari nisi punën për të rivënë në funksion terminalin e eksportit. Të dielën në mbrëmje, këto punime shkaktuan një shpërthim dhe zjarr në objektin e furnizimit me gaz, Barzan, njoftoi kompania shtetërore Qatar Energy.
Shkalla e dëmeve mbetet ende e panjohur pas shpërthimit. Fillimisht, zyrtarët deklaruan se vetëm disa persona ishin lënduar, por disa orë më vonë Ministria e Brendshme e Katarit publikoi shifra shumë më të larta për viktimat.
Impianti Barzan kishte një kapacitet prej pothuajse 39.6 milionë metra kub gaz në ditë, të cilin Katari e përdorte kryesisht për prodhimin vendas të energjisë elektrike dhe për furnizimin e impianteve të tij jetike të desalinizimit të ujit në zonat shkretinore të Gadishullit Arabik.
Katari zotëron pothuajse të gjithë impiantin, ndërsa një pjesë e vogël i përket edhe ExxonMobil. Kompania e naftës nuk iu përgjigj menjëherë një kërkese për koment.
Në mars, një raketë iraniane goditi Ras Laffan, duke shkaktuar një zjarr që solli dëme “të konsiderueshme” përpara se të shuhej, thanë autoritetet. Katari e kishte ndaluar tashmë prodhimin atje për shkak të sulmeve iraniane.
Katari ndan me Iranin fushën e tij gjigante detare të gazit natyror në Gjirin Persik. Pikërisht ky prodhim i gazit natyror e ka bërë Katarin një vend shumë të pasur. Ai i ka përdorur këto të ardhura për të rritur ndikimin e tij në arenën ndërkombëtare, përmes organizimit të Kupës së Botës FIFA 2022, krijimit të rrjetit mediatik Al Jazeera dhe financimit të rolit të tij si ndërmjetës ndërkombëtar, përfshirë bisedimet në Zvicër mes Iranit dhe Shteteve të Bashkuara.
