Dani Alves ndodhet në burg për pak më shumë se një javë, i akuzuar për përdhunimin e një vajze 23-vjeçare në klubin e natës Sutton në Barcelonë. Ka pasur disa përditësime që kanë dalë në lidhje me mënyrën sesi braziliani, të cilit iu mohua lirimi me kusht, po përballet në burg.
Programi spanjoll ‘Ya es mediodía’ ka zbuluar sendet që ish-lojtari i Pumas ka marrë në burg. Një reporter i programit Telecinco tregoi se me hyrjen në burg, 39-vjeçari ka marrë një kartë me 100 euro për t’i shpenzuar për blerje brenda burgut. Edhe pse atje mund të blihen të gjitha llojet e produkteve, ‘Ya es mediodía’ raportoi se Alves bleu gjëra të nevojshme si katër kanaçe ton, katër kos, një shishe shampo, një deodorant dhe disa pije energjike.
Ish-mbrojtësi i Barcelonës thuhet se ka refuzuar të blejë rroba shtesë dhe po e mban kartën për çdo gjë tjetër që i nevojitet në burg. Edhe pse nëse dëshiron mund ta ketë në qeli një të tillë, Alves ka vendosur të mos ketë televizor për momentin, për të mos parë ndonjë lajm nga jashtë për rastin e tij.
Gjithashtu u raportua se disa të burgosur kanë frikë se vizitat e tyre do të vonohen për shkak të pranisë së një futbollisti me një profil kaq të lartë. Dani Alves ka pranuar tradhtinë ndaj gruas së tij, por këmbënguli që e reja e pranoi këtë. Avokati Cristobal Martell tha për Antena 3 se klienti i tij ka mohuar që të ketë ndodhur një sulm seksual më 30 dhjetor në tualetin e zonës VIP të klubit të natës Sutton në Barcelonë, megjithëse ai e ka pranuar se ka qenë i pabesë ndaj gruas së tij.
Thuhet se arsyeja pse Alves nuk dha një version më koherent të fakteve më parë ishte sepse braziliani po përpiqej t’i fshihte gruas së tij këtë pabesi. Kujtojmë gjithashtu se para pak ditësh partnerja e tij fshiu nga rrjeti i saj social çdo postim të saj me futbollistin.
