Policia e Shtetit njofton se ka arrestuar tre shtetas të shpallur në kërkim ndërkombëtar. Sipas njoftimit zyrtar, dy janë pjesëtarë të organizatave kriminale në Itali, të akuzuar për trafikim të lëndëve narkotike, një 32 vjeçar dhe një grua 60 vjeçe, respektivisht të prangosur në Mamurras e Shkodër. Një shtetas tjetër akuzohet në Suedi, për kanosje serioze për vrasje. Ky i fundit u kap në Tiranë.
Drejtoria e Forcës së Posaçme Operacionale (Fast Albania) kapi dhe vuri në pranga dy pjesëtarë të organizatave kriminale në Itali, të akuzuar për trafikim të lëndëve narkotike, si dhe një shtetas të akuzuar në Suedi, për kanosje serioze për vrasje.
Si rezultat i koordinimit të informacioneve dhe veprimeve operacionale, me homologët e Policisë italiane dhe ata të Policisë suedeze, në kuadër të operacionit policor “Operacionalja 22”, u lokalizuan dhe u vunë në pranga shtetasit: Y. Zh. alias Y. Gj., 32 vjeç, i lindur në Mamurras. Ai u kap në Mamurras, pasi Gjykata e Vareses, Itali, i ka caktuar masën e sigurisë “Arrest në burg”, për veprën penale “Trafikimi i lëndëve narkotike”, kryer në kuadër të organizatës kriminale;
L.F alias L.D., 60 vjeçe, e lindur në Shkodër. Ajo u kap në Shkodër, pasi Gjykata e Apelit e Firences, Itali, i ka caktuar masën e sigurisë “Arrest në burg”, për veprën penale “Trafikimi i lëndëve narkotike”, kryer në kuadër të organizatës kriminale; A. F., 37 vjeç, shtetas suedez. Ai u kap në Tiranë, pasi Gjykata e Orebros, Suedi, ka lëshuar urdhër arresti për të, për veprën penale “Kanosja serioze për vrasje”.
Interpol Tirana po bashkëpunon me homologët në Itali dhe në Suedi, për të finalizuar procedurat e ekstradimit të këtyre shtetasve.
