Pak para se të paraqitej përsëri në gjykatë, ish-ylli i Hollywood-it Harvey Weinstein foli për jetën e tij në Rikers Island, ku po vuante dënimin në një seksion të sigurisë maksimale.
Ai e përshkroi përvojën si “ferr” dhe tha se është i izoluar, duke shtuar se po lutet të kthehet në burgun shtetëror ku ndodhej më parë.
Autoritetet i kanë thënë se nuk mund të kthehet atje për shkak të nevojës për mbikëqyrje para gjyqit.
Unë flas vetëm me rojet dhe infermierët, kjo është e gjitha shoqëria ime këtu. Në krahun tim nuk ka shoqëri, sepse është Rikers dhe është ferr
-tha Weinstein për Hollywood Reporter.
Avokati i tij kishte deklaruar më parë se Weinstein po keqtrajtohej dhe ishte diagnostikuar me leuçemi kronike mieloide që nga vjeshta e vitit 2024.
Weinstein raportoi gjithashtu incidente dhune nga të burgosurit e tjerë, duke treguar një rast ku u godit në fytyrë dhe ra në dysheme.
Ai shtoi se izolimi është bërë i domosdoshëm për t’u mbrojtur si një person i famshëm, pasi të burgosurit e tjerë e ngacmonin dhe e kërcënonin vazhdimisht për para dhe shërbime ligjore.
Në qershor 2025, Weinstein u shpall fajtor për sulm seksual të lidhur me ish-asistenten Miriam Haley dhe, më herët, në vitin 2022 u dënua në Kaliforni për përdhunim të një aktoreje në Beverly Hills, duke marrë 16 vjet burg.
Tani ai po përballet me një rigjykim për një akuzë të tretë për krim seksual që përfshin aktoren aspirante Jessica Mann.
