Izraeli do të ndalojë furnizimin me energji elektrike në Rripin e Gazës, njoftoi sot ministri i Energjisë Eli Cohen, një javë pasi ndërpreu ndihmat humanitare në territorin palestinez për të ushtruar presion ndaj Hamasit.
“Po firmos urdhrin për ndalimin e menjëhershëm të furnizimit me energji elektrike në Rripin e Gazës”, thotë ai.
“Ne do të përdorim të gjitha mjetet në dispozicionin tonë për të rikthyer të gjithë pengjet”, shtoi ai, ndërsa Izraeli dhe lëvizja islamike palestineze akuzojnë njëri-tjetrin për shkeljen e marrëveshjes së armëpushimit që hyri në fuqi më 19 janar.
Më herët, Donald Trump lëshoi atë që e quan “paralajmërimin e fundit” ndaj Hamasit për të liruar të gjitha pengjet e mbetura në Gazë. Në “TruthSocial”, mes të tjerash, presidenti amerikan shkroi se po i “dërgonte Izraelit gjithçka i nevojitet për të përfunduar detyrën”. Më herët, Trump priti në Shtëpinë e Bardhë 8 ish-pengje.
Angazhimi i drejtpërdrejtë vjen pasi vazhdimi i armëpushimit në Gaza mbetet i pasigurt. Presidenti Trump ka sinjalizuar se nuk ka ndërmend të ushtrojë presion ndaj Izraelit që të mos i rifillojë luftimet nëse Hamasi nuk pajtohet me kushtet e një propozimi të ri armëpushimi, të cilin izraelitët thonë se është hartuar nga i dërguari amerikan, Steve Witkoff.
Gjuha e ashpër vjen ndërsa Shtëpia e Bardhë tha dje se zyrtarët amerikanë janë angazhuar në “bisedime dhe diskutime të vazhdueshme” me zyrtarët e Hamasit, duke u tërhequr nga një politikë e kahershme e Shteteve të Bashkuara për të mos u përfshirë direkt në bisedime me grupin militant.
Konfirmimi i bisedimeve në kryeqytetin e Katarit, Doha, vjen pasi armëpushimi mes Izraelit dhe Hamasit mbetet i ekuilibruar. Ky është angazhimi i parë, që dihet, i drejtpërdrejtë mes Shteteve të Bashkuara dhe organizatës militante, që kur Departamenti i Shtetit e shpalli Hamasin organizatë të huaj terroriste në vitin 1997.
