Presidenti i Republikës, Bajram Begaj sot uroi të gjithë besimtarët myslimanë për festën e Kurban Bajramit. Në një mesazh në rrjetet sociale shkroi:
Kurban Bajrami është dita në të cilën besimtarët myslimanë afrohen më pranë Zotit, është festa e ngadhënjimit të sakrificës së sinqertë dhe besimit në Zot.
Kurban Bajrami është dëshmi e pashtershme sesi sakrifica, durimi dhe dashuria i japin njerëzve paqen e tyre të brendshme dhe mposhtin egoizmin, urrejtjen dhe pangopësinë.
Uroj nga zemra të gjithë besimtarët myslimanë dhe të gjithë shqiptarët për më shumë mirësi dhe gëzime në familjet e tyre! Gëzuar Kurban Bajramin dhe qofshi në mbrojtjen e Zotit!
Urimin e Kurban Bajramit e dha edhe kryeministri Edi Rama:
Gëzuar Kurban Bajramin!
Besimtarët myslimanë sot po festojnë Kurban Bajramin, një nga dy festat më të rëndësishme në kalendarin islam. Në Tiranë, me mijëra prej tyre u mblodhën në mëngjes në bulevardin “Dëshmorët e Kombit”. Namazi u fal në mbarë vendin. Festa simbolizon sakrificën sublime të babait të profetëve, Ibrahimit a.s.
Në të gjithë vendin, besimtarët myslimanë e kanë nisur kremtimin e kësaj feste të shenjtë që në orët e para të mëngjesit duke iu drejtuar xhamive për të falur Namazin.
Kurbani është një festë në të cilën në çdo zemër e vatër duhet të hyjë gëzimi, dora e solidaritetit dhe përkrahjes. Eshtë festa e ngjalljes së shpresës dhe e optimizmit për të vazhduar me këmbëngulje besnikërinë ndaj Zotit të gjithësisë, se ai është Falës i Madh, Mëshirues i Pakufijshëm.
Me emrin e kësaj feste janë të lidhura ngjarje madhore që kanë ndryshuar rrjedhën e historisë, si: rindërtimi i Qabes, haxhi, emërtimi “mysliman”, etj.
Kreu i Komunitetit Mysliman të Shqipërisë, Bujar Spahiu mbajti një fjalim e ndërsa uroi festën, theksoi rëndësinë e unitetit, dashurisë për njëri-tjetrin dhe ndihmës për ata në nevojë. Kleriku i lartë u shpreh se sot është një festë e dyfishtë, pasi Kurban Bajrami përkon me ditën e rëndësishme të xhumasë.
Si rrallëherë, sot bashkohet dita më e bukur e javës, e xhumasë, me ditën më të bukur të vitit, atë të Kurban Bajramit, një gëzim i dyfishtë.
Spahiu uroi paqe, begati e mirësi.
