Presidenti serb, Aleksander Vuçiç hodhi akuza se politika që ndjek Albin Kurti synon ta fusë Serbinë në konflikt me Aleancën e Atlantikut të Veriut. Sipas tij, Kurti po kërkon “arsye të mjaftueshme për marrëzitë që thotë” duke dashur ta tërheqë Serbinë në një konflikt me NATO-n. Por, shtoi se Beogradi duhet që ta shmangë një përplasje të tillë.
Ne e kuptojmë se ata e perceptojnë Kosovën si të pavarur dhe e shpërfillin faktin që qytetarët e Serbisë e shohin Kosovën si pjesë të Republikës së Serbisë. Ne duam një zgjidhje kompromisi, edhe pse Kurti nuk dëshiron të kërkojë zgjidhje, por të dëbojë të gjithë serbët.
Duke komentuar akuzat e deputetes e kryetares së Komisionit për Politikë të Jashtme të Parlamentit Britanik, Alisha Kearns mbi kontrabandën e armëve nga Serbia qendrore në Kosovë, si dhe pretendimet se agjentët e inteligjencës britanike po hedhin themelet për një luftë në Kosovë, Vuçiç u shpreh se ai nuk mendon se Londra ka arsye për të krijuar një luftë në Ballkan.
Vuçiç tha se “Perëndimi e nënvlerëson ushtrinë serbe, e cila tani është 12 herë më e fortë se 10 vjet më parë” dhe se “nuk është më aq e lehtë ta sulmosh Serbinë, veçanërisht nga ajri”.
Gjithçka që fluturon sot në Forcën Ajrore Serbe është e armatosur deri në dhëmbë, madje edhe njësitë e transportit.
I pyetur se çfarë do të thotë me këtë, kreu i shtetit serb deklaroi se nuk i pëlqen të dërgojë mesazhe dhe se “ushtria duhet të jetë pengesë për ata që do të sulmojnë Serbinë”. Sipas tij, “kushdo që sulmon Serbinë do të paguajë një çmim shumë më të lartë se në vitin 1999”.
Serbia ka marrëdhënie korrekte dhe profesionale me NATO-n!
Vuçiç theksoi edhe se ka folur me presidentin e Turqisë, Rexhep Tajip Erdogan për dhurimin e mjeteve ushtarake për Kosovën e nënvizoi se kjo është në kundërshtim me të drejtën ndërkombëtare, sepse “Kosova nuk duhet që të ketë ushtri”.
