Alarmi për përhapjen e hantavirusit po bëhet gjithnjë e më serioz, pasi janë konfirmuar raste të reja në një anije turistike që ndodhet në Oqeanin Atlantik. Sipas raportimeve, tre persona kanë humbur jetën dhe një shtetas britanik është në gjendje të rëndë shëndetësore, në atë që dyshohet si shpërthim i virusit në bord.
Operatori i anijes ka bërë të ditur se viktimat janë një burrë dhe një grua nga Holanda, si dhe një shtetas gjerman. Deri më tani janë konfirmuar dy raste me hantavirus, ndërsa autoritetet shëndetësore po vijojnë hetimet për të përcaktuar përmasat e situatës.
Hantavirusi është një virus që zakonisht transmetohet nga brejtësit përmes kontaktit me jashtëqitjet, urinën ose pështymën e tyre. Ai mund të shkaktojë infeksione të rënda të sistemit të frymëmarrjes dhe aktualisht nuk ekziston një trajtim specifik i drejtpërdrejtë. Megjithatë, ekspertët theksojnë se transmetimi nga njeriu te njeriu është shumë i rrallë.
Anija turistike “MV Hondius” ndodhet aktualisht pranë brigjeve të Kepit të Gjelbër dhe ka në bord 149 persona nga 23 vende të ndryshme. Për shkak të situatës, Organizata Botërore e Shëndetësisë po shqyrton mundësinë e evakuimit të plotë të pasagjerëve dhe ekuipazhit.
Sipas burimeve, ishujt Las Palmas dhe Tenerife në Spanjë po konsiderohen si pika të mundshme për zbarkimin dhe menaxhimin e situatës.
Autoritetet ndërkombëtare shëndetësore janë në gatishmëri të lartë, ndërsa priten zhvillime të mëtejshme në lidhje me këtë ngjarje.
