Një shpërthim i fuqishëm në sipërfaqen e Diellit ka vënë në alarm shkencëtarët, pasi një re gjigante plazme po lëviz drejt Tokës dhe mund të shkaktojë një stuhi gjeomagnetike gjatë fundjavës. Fenomeni është shkaktuar nga njolla aktive diellore 4465, e cila prodhoi një nxjerrje masive koronale (CME), duke lëshuar në hapësirë sasi të mëdha grimcash të ngarkuara dhe plazme me shpejtësi të lartë. Megjithëse shpërthimi diellor u klasifikua si C6, një nivel i moderuar, masa e krijuar ka një trajektore të drejtpërdrejtë drejt planetit tonë.
Sipas parashikimeve të shkencëtarëve, reja e plazmës pritet të arrijë magnetosferën e Tokës më 13 qershor, duke shkaktuar shqetësime në fushën magnetike të planetit. Ekspertët vlerësojnë se ndikimi mund të sjellë një stuhi gjeomagnetike të kategorisë G2. Ky nivel konsiderohet i moderuar, por mund të krijojë aurora spektakolare të dukshme edhe në zona ku zakonisht nuk shfaqen, si dhe të shkaktojë ndërprerje të kufizuara në komunikimet radio dhe luhatje të vogla në rrjetet elektrike të rajoneve veriore. Autoritetet dhe agjencitë hapësinore po monitorojnë nga afër zhvillimet, ndërsa theksojnë se nuk priten pasoja serioze për infrastrukturën globale.
Sipas NASA-s, një sferë e madhe si flluskë mbron sistemin tonë diellor nga kaosi i hapësirës së thellë. Dielli lëshon grimca të ngarkuara në atmosferë, të cilat krijojnë një flluskë të njohur si heliosferë. Në fund të shtatorit, Sonda Ndëryjore e NASA-s për Hartimin dhe Përshpejtimin Ndëryjor (IMAP) do të dërgohet në hapësirë për të studiuar heliosferën. NASA shpreson të zbulojë më shumë rreth mënyrës se si sistemi ynë diellor mbrohet nga rrezatimi kozmik dhe grimcat ndëryjore nga flluska gjigante.
Shkencëtarët e NASA po planifikojnë të ndërtojnë një radioteleskop gjigant në anën e errët të Hënës. Sipas revistës LiveScience, nëse projekti miratohet, mund të ndërtohet nga viti 2030 me një kosto prej më shumë se 2 miliardë dollarësh. Shkencëtarët duan të ndërtojnë radioteleskopin për të ndihmuar në zbulimin e disa prej mistereve më të mëdha të universit. Një arsye tjetër është edhe rritja e niveleve të rrezatimit që vjen nga vargjet e mëdha të sateliteve private, që sipas shkencëtareve, se shpejti do të jetë një problem për radioastronominë nga Toka.
