Të jesh i dashuruar mund të ndikojë në trup më shumë sesa mendohet. Një studim i realizuar nga “Universiteti Stanford” ka zbuluar se ndjenjat intensive romantike aktivizojnë zona të trurit që lidhen me shpërblimin dhe reduktimin e perceptimit të dhimbjes.
Gjatë eksperimentit, pjesëmarrësit që ishin në fazat e hershme të dashurisë romantike u ekspozuan ndaj stimujve të dhimbshëm ndërsa shikonin fotografi të partnerëve të tyre. Rezultatet treguan se niveli i dhimbjes së raportuar ishte dukshëm më i ulët.
Sipas studiuesve, aktivizohen të njëjtat qarqe neurologjike që përfshihen në sistemin e shpërblimit, duke çliruar substanca si dopamina.
Kjo jo vetëm që krijon ndjesinë e euforisë, por mund të ndikojë edhe në mënyrën se si truri interpreton sinjalet e dhimbjes.
Ekspertët sqarojnë se kjo nuk do të thotë se dashuria zëvendëson trajtimet mjekësore, por se lidhjet emocionale pozitive mund të kenë efekte reale biologjike.
Studime të tjera kanë treguar se personat me marrëdhënie të qëndrueshme dhe mbështetëse raportojnë nivele më të ulëta stresi, tensioni arterial dhe simptomash depresive.
Psikologët argumentojnë se një partner i besueshëm krijon një ndjenjë sigurie që ndikon pozitivisht në shëndetin mendor dhe fizik. Kjo është arsyeja pse cilësia e marrëdhënies shpesh ka më shumë rëndësi sesa statusi i thjeshtë i të qenit në çift.
