Japonia miratoi planin për të hedhur në Oqeanin Paqësor më shumë se një milion tonë ujë të ndotur nga centrali i shkatërruar bërthamor i Fukushimës. Sasia do të trajtohet e hollohet në nivele të parrezikshme për njeriun, që rrezatimi të jetë nën ato të vendosura për ujin e pijshëm. Qeveria japoneze tha se puna për lëshimin e ujit që përdoret për të ftohur karburantin bërthamor pritet të fillojë brenda dy vjetësh.
Rreth 1.25 milion tonë ujë u ruajtën në rezervuarë në termocentralin bërthamor Fukushima, nga koha kur tërmeti shkatërrimtar i vitit 2011 shkaktoi shkrirjen e reaktorëve. Operatori Tokyo Electric Power vazhdon të injektojë ujë në tre reaktorë për t’i mbajtur të ftohtë.
Ndërsa lëshimi në det i ujit nga Fukushima pritet të marrë dekada, banorët e zonës, si dhe peshkatarë e ambjentalistë në Japoni e po ashtu Kina e Koreja e Jugut e kundërshtuan planin, bazuar në shqetësimet për sigurinë.
Por Agjencia Ndërkombëtare për Energjinë Bërthamore dha OK-ein e sqaroi se kjo është e ngjashme me procedurat që ndjekin impiantet bërthamore në botë për hedhjen e ujërave.
Gjithashtu, Departamenti Amerikan i Shtetit e mbështeti vendimin e Japonisë, të cilin e konsideron “në përputhje me standardet e pranuara në nivel global për sigurinë atomike”.
