Kryeministri i Kosovës, Albin Kurti në udhëtimin e parë pa viza iu drejtua me radio udhëtarëve nga vendi i kapitenit të avionit. “Ky nuk është kapiteni juaj por kryeministri juaj”, u është drejtuar Kurti udhëtarëve. Ai u kërkoi qytetarëve që të respektojnë rregullat dhe afatet kohore të qëndrimit.
Mirdita të gjithëve! Ky nuk është kapiteni juaj por kryeministri juaj. Fillimisht urime Vitin e Ri. Sot është dita e parë e vitit 2024 por dhe dita e parë e udhëtimit pa viza. Në fluturimin OS678 janë dhe 50 udhëtarë të udhëtimit të parë pa viza në Vjenë. Ju ftoj të shijoni sheshet, pallatet e t’ia kaloni bukur në muzeun e historisë në Vjenë. Mos qëndroni më shumë se 90 ditë pasi siç e dini liritë kanë rregulla. Le të udhëtojmë lirshëm duke respektuar rregullat.
Prej ditës së sotme qytetarët e Kosovës do të mund të udhëtojnë pa viza në shtetet e zonës Schengen.
Në Aeroportin Ndërkombëtar të Prishtinës “Adem Jashari”, sot u organizua udhëtimi i parë i 50 qytetarëve, që fituan udhëtimin drejt Vjenës së Austrisë në kuadër të të një fushate informuese të autoriteteve lidhur me liberalizimin e vizave.
