Los Angeles është në flakë për shkak të përleshjeve mes policisë amerikane dhe atyre që protestojnë prej tre ditësh kundër autoriteteve të emigracionit që kanë arrestuar qindra njerëz javët e fundit. Donald Trump ka vendosur të përdorë grushtin e hekurt duke dërguar Gardën Kombëtare dhe akuzoi guvernatorin demokrat Newsom për “paaftësi”.
Sipas CNN-it, forcat e vendosura në Los Angeles përdorën shkopinj gome, gaz lotsjellës dhe plumba gome për të shpërndarë protestuesit. Policia i paralajmëroi demonstruesit se “dhuna do të përballet me forcë proporcionale”.
Dhjetë protestues u arrestuan gjatë përleshjeve me policinë në qendër të Los Angeles-it. Një zyrtar policor u shpreh:
Puna jonë nuk është të ndajmë komunitetet ose të politizojmë zbatimin e ligjit. Detyra jonë është thjesht t’i mbajmë të gjithë të sigurt.
Në një tjetër zhvillim, tashmë ka hyrë në fuqi urdhri ekzekutiv i nënshkruar nga presidenti amerikan, Donald Trump, të mërkurën e kaluar. Qytetarëve të 12 vendeve nuk iu lejohet hyrja në Shtetet e Bashkuara të Amerikës. Lista e vendeve përfshin: Afganistanin, Mianmarin, Çadin, Kongon, Guinenë Ekuatoriale, Eritrenë, Haitin, Iranin, Libinë, Somalinë, Sudanin e Jemenin.
