Shpenzimet e konsumatorëve në aplikacionet mobile kanë arritur një rekord 64.9 miliardë dollarë gjatë gjysmës së parë të vitit 2021. Kjo sipas të dhënave paraprake nga “Sensor Tower”. Sipas mediave të huaja, kjo shifër përfaqëson një rritje prej 24.8% të shpenzimeve në App Store dhe Google Play, krahasuar me periudhën e një viti më parë.
Por ndërsa ekspertët e industrisë besojnë se zhvendosja e përshpejtuar në celular e nxitur nga pandemia është një prirje që do të vazhdojë, vlen të përmendet se me gjithë rekordin e ri norma e rritjes për shpenzimet e konsumatorit është ngadalësuar pak dhe rritja e shkarkimeve u ngadalësua në mënyrë dramatike.
Për krahasim, nga gjysma e parë e vitit 2019 në gjysmën e parë të vitit 2020, shpenzimet e konsumatorëve në aplikacionet për celularë u rritën me 28.4% nga 40.5 miliardë dollarë në 52 miliardë dollarë, më ngadalë se 24.8% e parë në periudhën aktuale.
App Store i Apple llogaritet me 41.5 miliardë dollarë në shpenzimet globale të konsumatorëve gjatë gjysmës së parë të vitit 2021, ose 1.8 herë më shumë, krahasuar me 23.4 miliardë dollarë të parë nga Google Play. Shpenzimet e konsumatorëve jashtë lojërave drejtoheshin nga sportet, financat, biznesi, librat dhe aplikacionet argëtuese.
TikTok mbeti një aplikacion me fitim të lartë gjatë gjysmës së parë të 2021, i ndjekur nga YouTube dhe Tinder. Sigurisht, shpenzimet në lojëra vazhdojnë të kontribuojnë në pjesën më të madhe të shpenzimeve të përgjithshme të konsumatorëve, duke arritur 44.7 miliardë dollarë gjatë gjysmës së parë të vitit.
Rrjeti social Tik Tok së shpejti do t’u japë përdoruesve mundësinë për të krijuar video më të gjata se 60 sekonda. Kompania po zgjat minutashin e videove deri në tre minuta. Ndërkaq, Facebook ka kapërcyer ditën e djeshme vlerën 1 trilionë dollarë për herë të parë. Kompania e medias sociale është e pesta që arrin këtë objektiv duke ju bashkuar Apple, Microsoft, Amazon dhe Google.
