I dërguari i administratës Trump për Lindjen e Mesme, Steve Witkoff tha se ai po përpiqet të organizojë një takim me delegacionin Ukrainas në Arabinë Saudite për të diskutuar rreth një marrëveshje paqeje.
“Tani jemi në diskutime për të koordinuar një takim me ukrainasit në Riad ose ndoshta në Jeddah, por është vendosur që do jetë në Arabinë Saudite”, u tha Witkoff gazetarëve në Uashington DC.
“Mendoj se ideja është që të formulojmë një kornizë për një marrëveshje paqeje dhe një armëpushim fillestar”, shtoi Witkoff.
Fjalët e Witkoff vijnë pasi Volodymyr Zelensky i tha Këshillit Evropian se Ukraina shpreson të ketë një “takim kuptimplotë” me SHBA javën e ardhshme.
Presidenti Volodymyr Zelensky tha se vendi i tij dëshiron paqe “por jo me çmimin e heqjes dorë nga Ukraina”.
Duke folur në Bruksel, ai u bën thirrje udhëheqësve evropianë të mbështesin hapat që ai ka përshkruar për ndërtimin e një paqeje “të plotë dhe të drejtë”.
Hapi i parë që ai përshkruan është një armëpushim në ajër dhe det. Hapi tjetër është lirimi i të burgosurve si mjet për të krijuar besim.
Zelensky thekson se duhet të ketë “besim themelor” në negociatat në vazhdim dhe thekson se lirimi i të burgosurve mund të ndihmojë në krijimin e këtij fondacioni.
“Kjo duhet të bazohet në të kuptuarit se çdo armëpushim apo masë për ndërtimin e besimit mund të shërbejë vetëm si një prolog për një zgjidhje të plotë dhe të drejtë, për një marrëveshje gjithëpërfshirëse për garancitë e sigurisë dhe përfundimin e luftës”, thotë Zelensky.
Presidenti ukrainas thotë gjithashtu se është mirënjohës për mbështetjen që ka marrë deri më tani, duke shtuar se njerëzit e tij vlerësojnë se “Evropa me të vërtetë po përpiqet të bëjë gjënë e duhur”.
Më herët Zelensky falënderoi liderët e tjerë për mbështetjen e tyre , duke thënë: “Gjatë gjithë kësaj periudhe, dhe javën e kaluar, ju qëndruat me ne”.
Ndërkohë, Rusia përsërit kundërshtimin e saj ndaj trupave evropiane në Ukrainë pas çdo marrëveshjeje paqeje, duke thënë se do të ishte “luftë e drejtpërdrejtë”.
