Presidenti Donald Trump tha se Uashingtoni dhe Teherani ende po zhvillojnë negociata për t’i dhënë fund konfliktit mes tyre, edhe pse sulmet janë intensifikuar në të gjithë rajonin, duke rritur më shumë rrezikun që konflikti të përshkallëzohet në një luftë të plotë në Lindjen e Mesme.
Po bisedojmë me ta. Mendoj se po tregohen seriozë, u tha Trump gazetarëve në Shtëpinë e Bardhë, duke iu referuar negociatorëve iranianë.
Trump ka folur shpesh për negociatat mes SHBA-ve dhe Iranit, duke pretenduar se një marrëveshje paqeje është afër, por bisedimet kanë dështuar dhe rinisën veprimet ushtarake. Presidenti amerikan pohoi se ende nuk ka marrë një vendim për rifillimin e sulmeve në shkallë të plotë. Në media u raportua se po takohej me këshilltarët, për këtë çështje.
Situata në Lindjen e Mesme është përshkallëzuar ndjeshëm, pasi porti i Hodeidahut në Jemen, i kontrolluar nga rebelët Huthi, u godit nga një sulm ajror. Sipas raportimeve, nga ky sulm u shkatërruan depo karburanti dhe qendra telekomunikacioni.
Milicia e mbështetur nga Irani akuzon Arabinë Saudite për sulmin dhe ka kërcënuar me hakmarrje. Mediat e lidhura me Huthët kanë lënë të kuptohet se objektiv i mundshëm mund të jenë terminalet e kompanisë saudite të naftës Aramco. Pak orë më parë, një cisternë nafte saudite u godit nga një dron në Detin e Kuq, duke pësuar dëme të lehta.
Ndërkohë, prej 36 orësh, forcat besnike të qeverisë së Jemenit, të mbështetura nga Arabia Saudite dhe Emiratet e Bashkuara Arabe, kanë nisur një ofensivë kundër Huthëve, duke sinjalizuar rifillimin e luftës civile. Përleshjet po zhvillohen në veriperëndim të vendit, mes bregdetit dhe kufirit me Arabinë Saudite, ndërsa diplomatë nga Omani po përpiqen të ndërmjetësojnë një armëpushim.
