Dëgjo live TOP ALBANIA RADIO
Dëgjo live TOP GOLD RADIO
Dëgjo live MY MUSIC RADIO
Voto në THE TOP LIST
Showbiz

Italia me Maneskin fiton Eurovision Song Contest 2021, Anxhela Peristeri e 21-ta!

Pas 31 vitesh, Italia fitoi Eurovision Song Contest 2021. Triumfin në Festivalin e Sanremos, grupi Maneskin e përsëriti me këngën “Zitti e buoni” në finalen e zhvilluar mbrëmë në Ahoy Arena të Rotterdam-it.

Anxhela Peristeri dhe “Karma” e saj nuk shkuan përtej vendit të 21-të, me vetëm 57 pikë, 22 nga juritë e vendeve pjesëmarrëse dhe 35 nga votat e publikut. Por për këngën me tekst të Olti Currit e muzikë të Kleidi Bahitit, këngëtarja ra në sy për performancën shpërthyese çka i siguroi Shqipërisë kualifikimin në finale mes 26 vendeve nga 39 që konkurruan gjithsej.

Në treshen e parë: Italia 524 pikë, Franca 499 e Zvicra 432.

Grupi rock Maneskin e siguroi fitoren falë votave të publikut që përmbysën klasifikimin e kryesuar nga Zvicra e Franca. Zvicrën që e mbylli garën e treta e përfaqësoi me “Tout l’Univers” Gjon’s Tears, emri i artit i kantautorit me origjinë shqiptare Gjon Muharremaj. Djali i një nëne nga Tirana dhe një babai nga Kosova, 22-vjeçari i lindur në Saanen të Bernës nuk është emër i panjohur për publikun shqiptar. Kur ishte 12-vjeç u bë pjesë e talent show-t “Albanians Got Talent” të transmetuar në Top Channel dhe u rendit i treti në finale.

Me organizimin e Eurovision Song Contest 2021, Europa dha një tjetër shembull të sfidës që po i bën pandemisë koronavirus që për shumë kohë çoi në ndalime të eventeve të këtyre përmasave.

Festivali Europian i Këngës u zhvillua në datat 18, 20 dhe 22 maj në Holandë dhe ishte spektakli klasik i Eurovision-it, edhe pse tre të parët u fokusuan te muzika pa shumë ndihmë në efektet skenike.

Tashmë, radha e Italisë për edicionin e vitit të ardhshëm. Për vendin fqinj, trofeun e kanë siguruar në të kaluarën Gigliola Cinquetti në 1964 e Toto Cutugno në 1990.