Populisti i ekstremit të djathtë, anti-islamiku Geert Wilders, ka arritur një fitore të madhe në zgjedhjet parlamentare në Holandë, të mbajtura një ditë më parë. Kështu treguan rezultatet pothuajse përfundimtare të dala sot.
Rezultati nënkupton që ai do të udhëheqë bisedimet për formimin e një koalicioni të ri qeverisës dhe ndoshta të bëhet kryeministri i parë i djathtë në një kohë trazirash politike, në pjesën më të madhe të kontinentit.
Teksa mbeten pak vota pa u numëruar, Partia e Lirisë, e udhëhequr nga Wilders ka siguruar 37 nga 150 vendet në parlament, më shumë se dyfishi i atyre të fituara në zgjedhjet e fundit.
Rezultatet përfundimtare zyrtare priten gjatë ditës së sotme.
Programi zgjedhor i Wilders-it përfshin thirrjet lidhur me një referendum për largimin e Holandës nga Bashkimi Europian, një ndalesë totale e pranimit të azilkërkuesve, si dhe kthimin e emigrantëve në kufijtë holandezë.
Ai gjithashtu mbron “de-islamizimin” e Holandës, megjithëse ka qenë më i butë për islamin gjatë kësaj fushate zgjedhore sesa në të kaluarën. Referuar çështjes së emigracionit që dominoi fushatën e tij, Wilders u shpreh:
Votuesit thanë: Ne jemi të lodhur nga kjo. Të sëmurë me barkun tonë. Tani kemi një mision për t’i dhënë fund “cunamit të azilit”. Holandezët do të jenë sërish numri një. Njerëzit duhet ta kthejnë kombin e tyre.
Por, ligjvënësi, i cili në të kaluarën është etiketuar si një version holandez i ish-presidentit amerikan Donald Trump do të duhet të formojë një qeveri koalicioni përpara se të marrë drejtimin e pushtetit. Kjo do të jetë e vështirë pasi partitë kryesore ngurrojnë të bashkojnë forcat me të dhe partinë e tij.
