Aktorja e njohur Angela Bassett, e cila ka ndërtuar një karrierë të spikatur duke portretizuar disa nga gratë më me ndikim në histori, ka zbuluar se ende ëndërron të luajë një rol të veçantë në ekran: atë të Mbretëreshës Nefertiti.
Bassett, e cila është bërë sinonim i interpretimeve të fuqishme, ka sjellë në jetë figura ikonike si Tina Turner në filmin “What’s Love Got to Do With It”, një rol që vetë Turner e përshkroi si “perfekt”.
Ajo gjithashtu ka luajtur Coretta Scott King, bashkëshorten e Martin Luther King, në filmin “Betty & Coretta”, si dhe është e njohur nga publiku botëror për rolin e Mbretëreshës Ramonda në suksesin e Marvel, “Black Panther”.
Kam pasur privilegjin e madh të luaj gra të forta me ngjyrë gjatë karrierës sime
-tha Bassett për “Coveteur”, duke theksuar se krenaria për këtë rrugëtim lidhet edhe me formimin e saj akademik në Yale, ku ajo u diplomua në Studime Afro-Amerikane dhe më pas përfundoi një Master në Arte të Bukura.
Megjithatë, aktorja pranon se ende nuk i ka realizuar të gjitha ambiciet e saj artistike. Kur u pyet për rolin e ëndrrave, ajo u shpreh pa hezitim:
Mbretëresha Nefertiti nga dinastia e 18-të e Egjiptit. Legjenda e fuqisë, intelektit dhe bukurisë së saj më tërheq shumë dhe do të doja ta portretizoja atë në ekran
Nefertiti, e njohur si një nga figurat më të rëndësishme të botës antike, udhëhoqi përkrah Faraonit Akhenaten një revolucion fetar në Egjiptin e lashtë.
Megjithëse varri i saj nuk është zbuluar kurrë, busti i famshëm i saj, i ruajtur në Berlin, mbetet një dëshmi e fuqisë dhe ndikimit të saj që vazhdon të frymëzojë edhe sot.
