Një nga termat më të debatuar në TikTok këtë vit është “bed rotting”, një praktikë ku qëllimisht kalon orë të tëra në shtrat duke mos bërë asgjë produktive, shpesh duke parë seriale, duke lundruar në rrjete sociale ose thjesht duke u shtrirë në heshtje. Ndonëse tingëllon si një tendencë e re e dembelizmit, për shumë të rinj kjo është një formë e qëllimshme pushimi emocional dhe mendor.
Hashtag-u #bedrotting ka tejkaluar më shumë se 400 milionë shikime në TikTok dhe ka ndezur debate të shumta midis psikologëve, krijuesve të përmbajtjes dhe përdoruesve të zakonshëm. Njëra anë e sheh këtë si një mënyrë të re për të normalizuar pauzën mendore, ndërsa të tjerë e kritikojnë si një formë e re e izolimit dhe shpërdorimit të kohës.
Psikologët e ndajnë mendimin. Sipas një analize të publikuar në Psychology Today:
Nëse “bed rotting” bëhet në mënyrë të vetëdijshme dhe të kufizuar në kohë, ajo mund të ketë efekt relaksues dhe restaurues. Por nëse shndërrohet në një zakon të përditshëm, mund të jetë simptomë e apatisë, ankthit ose depresionit latent.
Kjo praktikë është kthyer gjithashtu në një simbol të revoltës kundër produktivitetit ekstrem. Brezi Z, më i lodhuri nga overload-i informacionit dhe presioni për të qenë gjithmonë “on”, po kërkon mënyra të reja për të dalë nga rrjeti, madje edhe duke mos bërë absolutisht asgjë. “Unë nuk po dembelosem, po rikuperoj,” është një nga frazat më të përdorura në videot për këtë trend.
Nëse më parë “pushimi” ishte vetëm aktivitet si joga, meditimi apo leximi, sot edhe mospasja e një aktiviteti mund të jetë një zgjedhje. Dhe ndërsa kultura e pushimit po transformohet, duket se shtrati, ai vend ku zakonisht kërkojmë strehim, po kthehet në një arenë të re të vetëkuptimit dhe të rimëkëmbjes emocionale.
