Keir Starmer po përballet me presion për të njohur menjëherë Palestinën si shtet, mes thirrjeve në rritje nga anëtarët e parlamentit dhe një angazhimi nga Franca. Kryeministri britanik dënoi kushtet humanitare në Gaza, para një telefonate me udhëheqësit e Francës e Gjermanisë.
Sipas tij, shtetësia është “e drejta e patjetërsueshme” e popullit palestinez, por pohoi se fillimisht duhet të ketë armëpushim. Starmer deklaroi:
Unë do të zhvilloj një telefonatë urgjente me partnerët e E3-shit, ku do të diskutojmë se çfarë mund të bëjmë urgjentisht për të ndaluar vrasjet dhe për t’iu siguruar njerëzve ushqimin që u nevojitet urgjentisht. Po ashtu do të bashkojmë të gjitha hapat e nevojshëm për të ndërtuar një paqe të qëndrueshme.
Starmer do të flasë me presidentin francez Emmanuel Macron, i cili ka konfirmuar se Franca do ta njohë shtetësinë palestineze, duke e shndërruar vendin e tij në të parin e G7-ës që e bën këtë, në një veprim që ai tha se do ta formalizonte në Asamblenë e Përgjithshme të OKB-së në muajin shtator.
Udhëheqësi i liberal-demokratëve, Ed Davey, bëri thirrje që Mbretëria e Bashkuar të ndjekë shembullin, duke thënë se “duhet ta udhëheqë këtë çështje dhe jo të mbetet prapa”.
Njihni shtetin e pavarur të Palestinës tani dhe merrni drejtimin në sigurimin e një zgjidhjeje me dy shtete dhe një paqeje të qëndrueshme!
Edhe kryetari i Bashkisë së Londrës, Sadiq Khan, bëri thirrje për njohje të menjëhershme, teksa Kongresi i Sindikatave ka shtyrë për njohjen formale të Palestinës “jo pas një viti apo dy vitesh, por tani”.
Emily Thornberry, kryetare e Komitetit të Punëve të Jashtme, vuri në dukje se shumica e anëtarëve të tij mbështesin njohjen menjëherë.
Eshtë pikëpamja e shumicës së komitetit që qeveria e Mbretërisë së Bashkuar duhet ta njohë menjëherë shtetin e Palestinës, duke sinjalizuar dëshirën e Mbretërisë së Bashkuar për të punuar urgjentisht drejt një zgjidhjeje me dy shtete së bashku me aleatët tanë.
Sekretarja e Drejtësisë, Shabana Mahmood, tha se qeveria dëshiron të njohë një shtet palestinez “si një kontribut për një proces paqeje”. Një ditë më parë, Starmer u shpreh:
Jemi të qartë se shtetësia është e drejtë e patjetërsueshme e popullit palestinez. Një armëpushim do të na vendosë në rrugën drejt njohjes së një shteti palestinez dhe një zgjidhjeje me dy shtete që garanton paqen dhe sigurinë për palestinezët dhe izraelitët.
