Këngëtarja e njohur britanike dhe ish-anëtarja e grupit “Little Mix”, Perrie Edwards, i ka dhënë fund beqarisë, duke kurorëzuar dashurinë e saj shumëvjeçare me futbollistin Alex Oxlade-Chamberlain në një ceremoni romantike në Portugali.
Çifti, që prej vitesh konsiderohet një nga dyshet më të dashura të showbiz-it britanik, u martua të shtunën në fshatin piktoresk të Estoit, sipas raportimit të Daily Mail.
Ceremonia u zhvillua në një kishë historike të shekullit të 16-të, ku Perrie dhe Alex shkëmbyen betimet përpara familjarëve dhe miqve më të afërt. Në dasmë morën pjesë rreth 70 të ftuar, duke krijuar një atmosferë intime dhe elegante për ditën e tyre më të rëndësishme.
Historia e dashurisë së çiftit nisi në vitin 2016, ndërsa dalja e tyre e parë publike si çift ndodhi në tapetin e kuq të Brit Awards në vitin 2019. Që prej asaj kohe, marrëdhënia e tyre ka qenë në qendër të vëmendjes së mediave dhe fansave.
Pas disa vitesh bashkë, ata mirëpritën në jetë fëmijën e tyre të parë, djalin Axel, në gusht të vitit 2021. Një vit më vonë, në qershor 2022, Alex i propozoi këngëtares, duke shënuar një tjetër hap të rëndësishëm në historinë e tyre.
Familja e tyre u zgjerua edhe më tej në janar të këtij viti me ardhjen në jetë të vajzës së tyre, Alanis Valentine.
Portugalia ka një vend të veçantë në zemrat e çiftit. Perrie dhe Alex kalojnë shpesh pushimet verore në Quinta do Lago, një nga zonat më luksoze të vendit, ndaj nuk është surprizë që zgjodhën pikërisht këtë destinacion për të festuar dashurinë e tyre.
Pas tetë vitesh lidhje, dy fëmijëve dhe katër vitesh fejesë, Perrie Edwards dhe Alex Oxlade-Chamberlain kanë nisur zyrtarisht kapitullin e ri të jetës së tyre si bashkëshortë, në një ceremoni që duket se ishte po aq magjike sa historia e tyre e dashurisë.
