Dita e katërt nga fillimi i Kupës së Botës për Klube dhe Reali i Madridit është vënë në start për premierën e tij në SHBA, teksa sonte në mbrëmje do të përballet me Al Hilal të Arabisë Saudite. Një ekip i ri i Madridit, me ide të freskëta dhe tani me Ksabi Alonson në stol. Trajneri spanjoll do të kërkojë të krijojë stilin e tij dhe, në të njëjtën kohë, të luftojë për trofeun e tij të parë si trajner i Realit. Kundërshtari është Al Hilal, një nga gjigantët e futbollit të Arabisë Saudite dhe që ka shpenzuar jo pak miliona për të ndërtuar një skuadër të denjë të garojë edhe me më të mëdhenjtë e topkëmbës.
Reali i Madridit dhe Al Hilal përballen këtë të mërkurë, më 18 qershor, në stadiumin “Hard Rock” në Majami, një stadium me një kapacitet prej pak më shumë se 65,000 spektatorësh, duke parashikuar një shitje të madhe biletash për të parë të bardhët në Shtetet e Bashkuara. Al Hilal duket të jetë pengesa e parë e Ksabi Alonsos, por do të shohim se si do të zhvillohen gjërat në këtë ndeshje që nuk duhet humbur.
Mbape, pengesa – Por ,që në ndeshjen e tij të parë si trajner i Realit, Ksabi Alonso mund të përballet me një mungesë të rëndësishme. Ylli i sulmit të Madridit, Kilië Mbape, nuk u stërvit në seancën e fundit stërvitore para ndeshjes kundër Al Hilal për shkak të temperaturës. Sulmuesi francez është në dyshim serioz për ndeshjen kundër ekipit arab, pasi temperaturat dhe lagështia e lartë në Majami e bëjnë të vështirë për ta detyruar lojtarin. Frutat dhe lëngjet kanë qenë dieta e tij gjatë 24 orëve të fundit. Francezi u stërvit normalisht të hënën, megjithëse me të mbërritur në hotel, ai njoftoi se nuk ndihej mirë.
Sulmuesi madje humbi drekën, dhe shërbimet mjekësore menjëherë u morën me lojtarin, i cili po përjeton një gjendje me ethe. Për këtë arsye, ai nuk mundi të merrte pjesë në fotosesionin e FIFAs dhe gjithashtu nuk mundi të takohej me presidentin Florentino Pérez, i cili u bashkua dje me ekipin. Mbape ka qëndruar në hotelin e ekipit dhe shpreson të jetë i disponueshëm për ndeshjen, megjithëse temperaturat dhe lagështia sugjerojnë që lojtarët që nuk janë në formën e tyre më të mirë nuk duhet të stërviten shumë. Madridi po stërvitet këto ditë në temperatura prej 30 gradë Celsius dhe lagështi prej 75%, kushte që pritet të jenë edhe më të vështira për ndeshjen.
Botërorin e Klubeve përcillet ekskluzivisht në DigitAlb.
