Harry Styles ka nisur zyrtarisht rezidencën e tij historike prej 12 netësh në stadiumin Wembley, duke performuar para një audience të mbushur plot në natën e parë të turneut të tij të ri global “Together Together”.
Ish-anëtari i grupit One Direction po feston publikimin e albumit të tij të katërt studio, “Kiss All the Time, Disco Occasionally”, ndërsa koncertet në Londër kanë hyrë tashmë në histori si rezidenca më e gjatë e mbajtur ndonjëherë nga një artist i vetëm në Wembley.
Mbrëmja rezervoi edhe një surprizë të veçantë për fansat, pasi në skenë iu bashkua legjenda e muzikës country, Shania Twain, e cila do të jetë e pranishme në të gjitha 12 koncertet londineze.
Lista e këngëve përfshinte hitet e njohura si Golden, Adore You dhe Music for a Sushi Restaurant, por edhe materiale të reja si “Dance No More”, “Aperture” dhe “Are You Listening Yet?”.
Pas Londrës, turneu do të vazhdojë në São Paulo, Mexico City, New York City, Melbourne dhe Sydney.
Megjithatë, pavarësisht suksesit të madh të koncertit, shumë fansa vazhdojnë të kritikojnë çmimet e larta të biletave.
Kur shitja nisi në janar, biletat për koncertet në Londër kushtonin nga 72.95 paund deri në 725.45 paund për paketat VIP, duke shkaktuar reagime të ashpra në rrjetet sociale.
Për këto çmime, pres që Harry Styles të vijë personalisht te vendi im me lule dhe të më puthë në ballë
-shkroi me ironi një fans në platformën X.
Të tjerë vunë në dukje se çmimet janë pothuajse dyfishuar krahasuar me turneun e tij të mëparshëm “Love On Tour”, ku biletat për vende të ngjashme kushtonin shumë më pak.
Debati u bë aq i madh sa edhe Liam Gallagher vendosi të komentojë me humor, duke thënë se kishte blerë 20 bileta për koncertet e Harry-t dhe planifikonte t’i shiste “10 herë më shtrenjtë”.
Rezidenca e Harry Styles në Wembley është vetëm një pjesë e turneut gjigant “Together Together”, i cili përfshin 50 koncerte në shtatë qytete të mëdha të botës.
Vetëm në Madison Square Garden ai do të mbajë plot 30 shfaqje, duke konfirmuar statusin e tij si një nga artistët më të mëdhenj të momentit.
Ndërsa koncertet po thyejnë rekorde pjesëmarrjeje, një pyetje vazhdon të dominojë diskutimet mes fansave: a ia vlejnë vërtet këto çmime marramendëse për të parë Harry Styles live?
