Shirat e dendur kanë shkaktuar përmbytje të mëdha në shtetin amerikan të Uashingtonit duke detyruar autoritetet të urdhërojnë evakuimin e dhjetëra mijëra banorëve. Guvernatori Bob Ferguson iu bëri thirrje atyre në zonat e rrezikuara të largohen e të ndjekin udhëzimet e autoriteteve lokale.
Vlerësohet se deri në 100 mijë banorë preken nga urdhrat e evakuimit.
E kuptoj që shumë prej njerëzve në shtetin tonë kanë përjetuar përmbytje të mëdha edhe më parë, tha Ferguson në një postim në X.
Megjithatë, tani po përballemi me një situatë historike, pasi pritet që niveli i ujit të jetë deri në 61 centimetra më i lartë se rekordi i mëparshëm.
Mbi 30 autostrada kryesore janë mbyllur për qarkullimin e mjeteve.
Po ashtu, shpalli një gjendje emergjence në të gjithë shtetin, për të mundësuar mobilizimin e shpejtë të fondeve e të personelit shtesë. Roja Kombëtare është dislokuar për të ndihmuar operacionet e shpëtimit në zonat e përmbytura.
Helikopterë dhe varka po përdoren për të transportuar njerëzit drejt zonave të sigurta. Dhjetëra lumenj kanë dalë nga shtrati, duke përmbytur qytete e toka bujqësore.
Shirat e dendur në veriperëndim të Shteteve të Bashkuara të Amerikës po shkaktohen nga një fenomen meteorologjik i njohur si “lum atmosferik”, një brez ajri me lagështi të lartë që mund të sjellë reshje intensive për disa ditë radhazi.
