Tetë vjet pas ndarjes që tronditi fansat e Hollywood-it, aktorja Anna Faris ka folur hapur për ndikimin emocional që pati divorci i saj nga Chris Pratt dhe vëmendja e madhe mediatike që e shoqëroi atë periudhë.
Në një intervistë për Variety, aktorja 49-vjeçare pranoi se fundi i martesës së saj me yllin e kinemasë ishte një nga momentet më të vështira të jetës.
Ka qenë e trishtueshme, vërtet shumë e trishtueshme
-u shpreh Faris, duke treguar se presioni i vazhdueshëm nga media e bëri edhe më të vështirë përballimin e situatës.
Megjithëse është mësuar prej vitesh me famën dhe jetën në qendër të vëmendjes, aktorja tha se ekspozimi publik i ndarjes ndikoi ndjeshëm tek ajo.
Faris zbuloi se një nga gjërat që e ndihmoi të kalonte atë periudhë ishte podcast-i i saj “Unqualified”, i cili i krijoi mundësinë të ndërtonte një komunitet jashtë botës së Hollywood-it dhe të lidhej me njerëzit në një mënyrë më autentike dhe personale.
Ajo pranoi gjithashtu se në atë kohë kishte menduar seriozisht të largohej nga aktrimi për t’iu përkushtuar shkrimit.
Historia e dashurisë mes Faris dhe Pratt nisi gjatë xhirimeve të filmit “Take Me Home Tonight”. Dyshja u martuan në vitin 2009 dhe u bënë prindër të djalit të tyre, Jack.
Pas gati një dekade martesë, çifti i dha fund lidhjes dhe divorci u finalizua në vitin 2018 për shkak të mosmarrëveshjeve të pakapërcyeshme.
Në intervista të mëparshme, Faris ka folur edhe për sfidat që sjell një marrëdhënie mes dy personave që punojnë në të njëjtën industri. Ajo ka pranuar se konkurrenca profesionale, presioni i famës dhe mungesa e komunikimit emocional ndikuan në disa nga marrëdhëniet e saj.
Sot, të dy kanë ndërtuar kapituj të rinj në jetën personale. Faris është e martuar me drejtorin e fotografisë Michael Barrett, ndërsa Chris Pratt ka krijuar familje me Katherine Schwarzenegger, vajzën e Arnold Schwarzenegger. Çifti ka tre fëmijë së bashku dhe vazhdon të jetë ndër çiftet më të komentuara në Hollywood.
Edhe pse kanë kaluar vite nga ndarja, rrëfimi i fundit i Anna Faris tregon se disa plagë emocionale kërkojnë kohë për t’u shëruar, veçanërisht kur jetohen nën sytë e publikut.
