Zgjatja e afatit të aplikimit për kredi të lehtësuara, sjell efekte pozitive, duke rritur numrin e familjeve që përfitojnë.
Në mbledhjen e djeshme të Këshillit Bashkiak, kryetarja e komanduar e Bashkisë Tiranë, Anuela Ristani, theksoi se nga 4409 aplikime, në fazën e parë janë shpallur fitues 2871 familje.
Aktualisht, jemi në fazën e shqyrtimit të ankimimeve të fazës së parë. Sipas afateve do të shpallet lista e aplikantëve fitues dhe jofitues, në përputhje me rezultatet e ankimimeve. Paralelisht, do të bëhet hapja e thirrjes për fazën e dytë të kredive.
Dorëzimi i dokumentacionit do të kryhet pranë sporteleve të pritjes me qytetarin ose përmes Postës Shqiptare, sqaroi Ristani.
Hapja e thirrjes së dytë do të shoqërohet me një njoftim të dytë publik, i cili do të përcaktojë edhe afatin e dorëzimit të dokumentacionit, deri më 31 korrik 2026.
