“Shqipëria ka qenë një nga destinacionet më të nxehta vitet e fundit dhe nuk ka asnjë arsye për të menduar se fluksi i turistëve do të “qetësohet” së shpejti”, shkruan Joel Balsam në një artikull të botuar në “Lonely Planet”.
Vendi ballkanik ka plazhe të bukura, me ujëra të kristalta. Në fakt, një prej tyre u shpall së fundmi si më i kaltëri në botë. Qytete të trashëgimisë së UNESCO-s, me rrugica magjepsëse dhe tunele nëntokësore, së bashku me shtigje ecjeje të mrekullueshme në Bjeshkët e Nemuna (Alpet Shqiptare).
Shumica e turistëve vizitojnë Shqipërinë në sezonin e verës (qershor-gusht) kur plazhet janë më të ngrohta dhe malet janë pastruar nga bora. Kjo është koha e shkëlqyer për ta vizituar vendin ballkanik. Vizitoni Shqipërine në maj ose tetor, me më pak turma dhe temperatura të ngrohta. Megjithatë, kjo periudhë mund të mos jetë ideale për të notuar në det pasi ende është i ftohtë.
Shumica e objekteve turistike jashtë qyteteve të mëdha dhe përgjatë bregdetit në Shqipëri, mbyllen në dimër (dhjetor-mars). Industria e turizmit fillon të hapet sërish pas festës së bektashinjve të pranverës, Ditës së Nevruzit, më 22 Mars. Nëse shkoni gjatë dimrit, qëndroni në kryeqytetin, Tiranë, ose në qytetin verior Shkodër, i cili organizon karnavale dimërore.
Planifikoni udhëtimet tuaja në Shqipëri gjatë gjithë vitit me këtë guidë sezonale.
Muajt qershor-shtator përbëjnë pikun e sezonit veror
Riviera Shqiptare në jug të vendit është quajtur “Maldivet e Europës”, vlerësim i cili merr kuptim kur mendon për ujin e kaltër në brigjet e Ksamilit dhe përreth. Zbulimi i Shqipërisë ka ndihmuar në rritjen e numrit të turisteve të huaj, kështu që gjatë pikut të sezonit pritet të ketë turma të mëdha vizitorësh.
Për t’i shpëtuar turmave më të mëdha, merrni me qira një makinë dhe udhëtoni deri në plazhin e Borshit e të Gjipesë. Gjithashtu, ju mund të bëni një turne me varkë nga Himarë në plazhet e izoluara ku mund të jeni vetëm ju dhe deti i hapur.
Nëse mund të prisni deri në shtator do të gjeni temperatura më pak të nxehta në bregdet dhe me më pak turma vizitorësh. Në përgjithësi, në Shqipëri ka vizitorë gjatë gjithë vitit, megjithëse mungesa e ndonjë flladi detar mund të shkaktojë nxehtësi ekstreme në korrik dhe gusht, me temperatura që rriten mbi 30°C. Zonat më të freskëta janë Bjeshkët e Nemuna, ku temperaturat mesatare lëvizin midis 17°C dhe 22°C në verë.
Gjithashtu, zbuloni një tjetër destinacion alternativ veror, Pogradecin.
Vizitoni Shqipërinë në maj ose tetor për klimë më të butë dhe me më pak turma
Të vizitosh pothuajse çdo vend jashtë pikut të sezonit është një ide e mirë. Ka më pak turma, mot të butë dhe çmime më të arsyeshme. E vetmja pengesë është rreziku i motit të keq, si shiu në pranverë.
Muajt maj-tetor janë veçanërisht idealë në Shqipëri. Në maj do të keni më shumë hapësirë për t’u shtrirë në plazhet e Rivierës Shqiptare, megjithëse mund të jetë pak freskët, temperaturat mesatare në Ksamil variojnë nga 16°C – 22°C.
Ndërsa maji është gjithashtu teorikisht një kohë e mirë për të ecur në male pasi ka më pak vizitorë në Shqipëri, vini re se bora mund të mos ketë shkrirë deri në fund të muajit. Vjeshta (tetor dhe nëntor) është gjithashtu një kohë e shkëlqyer për të vizituar Shqipërinë, pasi do të keni mundësinë të shihni ndryshimin e gjetheve në vende si Parku Kombëtar i Thethit. Vjeshta është gjithashtu perfekte për të vizituar qytetet e UNESCO-s si Gjirokastra dhe Berati.
Shumica e akomodimeve në Shqipëri mbyllen gjatë dimrit, por ende ka argëtim gjatë sezonit dimëror. Dimri është gjithashtu një kohë e mirë për të vizituar muzeun magjepsës të Shtëpisë me Gjethe të Tiranës, i cili dokumenton historinë e spiunazhit gjatë diktaturës paranojake të vendit, nën drejtimin e Enver Hoxhës.
Nëse mund ta përballoni të ftohtin në veri të Shqipërisë, vizitoni Shkodrën. Në shkurt, qyteti pret festime të karnavaleve me interpretues të maskuar dhe parada në rrugë. Adhuruesit e verës mund të vizitojnë në dhjetor qytetin e Pogradecit, i cili pret Festivalin e Verës dhe Gështenjës.
