Debati politik për arkivolin e vendosur para Kryeministrisë gjatë protestës së të shtunës ka vazhduar edhe këtë të dielë. Pas reagimeve të kryeministrit Edi Rama, i cili e krahasoi simbolikën e arkivolit me ngjarjet e 14 Shtatorit 1998, dhe ministrit Taulant Balla, që e cilësoi atë një akt të papranueshëm, ka reaguar edhe ministri i Jashtëm Ferit Hoxha
Përmes një postimi në rrjetet sociale Ministri shpreh keqardhje për transformimin e protestës “nga flamingot tek arkivoli” dhe se idea e rikthimit të një Shqipërie deja vu, është e papranueshme
Postimi i plotë i Ministrit Ferit Hoxha:
Nga flamingot te arkivoli.
Nga mbrojtja e mjedisit te gjyqi publik.
Nga shqetësimi qytetar te papërgjegjshmëria.
Nga protesta paqësore te dhuna.
Nga vizioni për një Shqipëri të Re te rikthimi i një Shqipërie déjà vu – të vjetër, të kapërcyer dhe të papranueshme.
Quo vadis?
Demokracia, liria dhe të drejtat nuk janë të dhëna.
Ato janë fituar me mund, sakrifica dhe përgjegjësi. Janë fryt i dialogut, jo i intimidimit; i urtësisë dhe pjekurisë shoqërore, jo i imponimit.
#Shqipëria2030, ajo që ëndërronim e që duam, anëtare e Bashkimit Evropian, më e zhvilluara ndonjëherë, më demokratike dhe më e arritura në historinë e saj, mund dhe do të ndërtohet vetëm me punë, vizion dhe përkushtim.
Me rininë, me atë që sheh vetëm përpara, për të ndërtuar, sepse kemi ende shumë për të bërë.
Bashkë!”
