Regjisori legjendar Martin Scorsese është vënë në qendër të një debati të fortë në industrinë e filmit, pasi bashkëpunimi i tij me kompaninë e inteligjencës artificiale Black Forest Labs ka shkaktuar reagime të ashpra nga komuniteti artistik.
Shoqata e Drejtorëve të Artit publikoi një deklaratë publike ku kritikoi hapur regjisorin e njohur, duke e akuzuar se po promovon teknologji që rrezikojnë të minimizojnë rolin e artistëve dhe profesionistëve krijues që kanë kontribuar në suksesin e filmave të tij ndër vite.
Sipas shoqatës, në videon promovuese të mjetit të inteligjencës artificiale FLUX, Scorsese sugjeron se teknologjia mund të ndihmojë regjisorët të shprehin më lehtë vizionin e tyre krijues.
Megjithatë, përfaqësuesit e artistëve argumentojnë se këto janë detyra që tradicionalisht janë kryer nga drejtorë arti, ilustrues, dizajnerë grafikë, skenografë dhe profesionistë të tjerë të industrisë së filmit.
Nuk mund të injorohen dekadat e punës së artistëve që kanë ndihmuar regjisorët të sjellin në jetë vizionet e tyre kreative
-thuhej në deklaratë.
Debati u ndez pasi Black Forest Labs njoftoi më 2 qershor se Scorsese do t’i bashkohej kompanisë si këshilltar, me synimin për të eksploruar mënyra të reja të përdorimit të inteligjencës artificiale në procesin krijues.
Nga ana e tij, regjisori mbrojti vendimin, duke argumentuar se kinemaja ka evoluar gjithmonë falë teknologjive të reja.
Në të kaluarën kam përdorur teknologjinë 3D në ‘Hugo’ dhe teknikat dixhitale të rigjallërimit në ‘The Irishman’. Tani ky mjet më ndihmon të komunikoj më qartë idetë e mia me ekipin krijues, në mënyrë që ata t’i zhvillojnë edhe më tej
-deklaroi Scorsese.
Megjithatë, kritikat nuk kanë ardhur vetëm nga sindikatat profesionale. Regjisori Boots Riley reagoi publikisht në rrjetet sociale, duke sugjeruar se vendimi i Scorsese mund të jetë ndikuar nga përfitimet financiare të marrëveshjes.
Sipas Riley, regjisori veteran mund të ketë pranuar bashkëpunimin duke menduar se inteligjenca artificiale nuk do të ketë ndikimin afatgjatë që shumë parashikojnë.
Polemikat rreth inteligjencës artificiale vazhdojnë të ndajnë opinionet në Hollywood, ku një pjesë e artistëve e shohin teknologjinë si një mjet ndihmës për kreativitetin, ndërsa të tjerë frikësohen se ajo mund të zëvendësojë profesionet krijuese dhe të dobësojë rolin e artistëve në industrinë e filmit.
Për momentin, Martin Scorsese mbetet një nga emrat më të mëdhenj që ka zgjedhur të mbështesë publikisht zhvillimin e inteligjencës artificiale në botën e kinemasë, një vendim që po vazhdon të ndezë debate të forta në industrinë e argëtimit.
