Elijah Allman, djali i këngëtares së njohur Cher, është dërguar me urgjencë në spital pas një mbidoze të dyshuar droge.
Ngjarja ndodhi ditën e djeshme, ndërsa oficerët e policisë, të cilët u thirrën në shtëpinë e tij për shkak të sjelljes së çrregullt, konfirmuan se gjetën substanca të dyshuara narkotike në banesë.
Oficerët tanë u përgjigjën ndaj një raportimi për një mashkull që po sillej në mënyrë të pazakontë. Kur mbërritën, Elijah Allman u trajtua menjëherë nga ekipi mjekësor
-thuhet në deklaratën e policisë për “People”.
Ish-bashkëshortja e tij, Marieangela King, në një prononcim për të njëjtën media, shprehu mbështetjen për Elijah, duke theksuar sfidat e shumta me të cilat ai është përballur dhe përkushtimin e tij për të qëndruar i matur dhe i lidhur me njerëzit që e duan.
Ky incident vjen pas disa vitesh të vështira për Elijah. Në dhjetor 2023, Cher kërkoi kujdestari të përkohshme mbi pasuritë e tij, duke përmendur shqetësime për abuzim me drogën dhe përkeqësim të gjendjes mendore.
Megjithatë, në shtator 2024, ata arritën një marrëveshje private dhe Cher hoqi dorë nga kërkesa për kujdestari.
Marrëdhënia mes Cher dhe djalit të saj është përshkruar shpesh si e ndërlikuar.
Unë dhe ai kemi një marrëdhënie të çuditshme. Ka pasur shumë situata të vështira mes nesh dhe ndonjëherë nuk e kuptoj plotësisht
-ka thënë Cher më parë.
