Ish-banori i “Big Brother VIP 5”, Seno Fishta, ka bërë një rrëfim të fortë emocional në emisionin “S’e Luan Topi”, duke zbuluar detaje të panjohura nga një prej kapitujve më të errët të jetës së tij: emigrimin, azilin dhe burgun.
Seno tregoi se periudha në Francë ishte jashtëzakonisht e vështirë, jo për mungesë strehimi, por për shkak të mungesës së dokumenteve dhe pritjes së gjatë për leje qëndrimi.
Për rreth gjashtë muaj, ai dhe partnerja e tij, Edra, jetuan në një kamp refugjatësh, në çadra, mes rreth një mijë personash, përfshirë edhe shumë gra shtatzëna.
Ai përshkroi kushtet e rënda në kamp, ku mungesa e energjisë elektrike i detyronte banorët të improvizonin, madje duke marrë rrymë nga ndriçimi i rrugës për të përdorur furrnela, gjithmonë me frikën e ndërhyrjes së autoriteteve.
Por drama më e madhe për Senon nisi pas lindjes së vajzës së tij. Vetëm një ditë pas ardhjes në jetë të saj, ai u ndalua në Zvicër dhe u përfshi në një hetim lidhur me narkotrafikun, për shkak të disa komunikimeve me persona të gabuar.
Seno pranoi se u arrestua dhe qëndroi në paraburgim për rreth 32 muaj, duke lënë Edrën vetëm në spital me vajzën e porsalindur.
E lashë vajzën njëditëshe dhe e gjeta 32 muajshe
-rrëfeu ai, duke theksuar sakrificën e jashtëzakonshme që ka bërë partnerja e tij gjatë gjithë kësaj kohe.
Seno nuk tentoi ta justifikojë veten, duke pranuar se nevoja financiare dhe zgjedhjet e gabuara e çuan drejt këtij realiteti të hidhur. Ai shprehu pendesë të thellë për kohën e humbur me fëmijët dhe familjen, duke rrëfyer momentin prekës kur vajza e tij nuk e njihte dhe nuk pranonte të rrinte në prehërin e tij.
Ndihem shumë fajtor ndaj vajzës, djalit dhe Edrës
-tha ai, ndërsa kujtoi se vajza kishte shprehur frikën se e donte të atin më shumë se nënën, një detaj që e preku thellë.
Rrëfimi i Seno Fishtës është një histori e fortë reflektimi mbi gabimet, pasojat dhe çmimin që shpesh paguhet nga familja, jo vetëm nga individi.
