Njohja e shtetit palestinez nga Britania e Madhe, Kanadaja dhe Australia është përshëndetur si një moment historik nga zyrtarët palestinezë dhe ata të Hamasit.
Mahmoud Mardawi, një zyrtar i lartë i Hamas, e ka konsideruar këtë hap një “fitore për të drejtat palestineze dhe drejtësinë e kauzës” së palestinezëve, duke theksuar se kjo është një dëshmi e forcës dhe legjitimitetit të kërkesave për një shtet të pavarur.
Mardawi ka shtuar se kjo njohje “dërgon një mesazh të qartë” se, pavarësisht intensifikimit të pushtimit dhe krimeve të mundshme që janë kryer gjatë periudhës së tij, ky pushtim nuk mund t’i fshijë të drejtat kombëtare të palestinezëve.
“Kjo është një fitore morale dhe politike për palestinezët, dhe një hap më afër realizimit të aspiratave tona për një shtet të pavarur dhe të drejtat tona të njohura ndërkombëtarisht,” tha Mardawi.
Britania e Madhe, Kanadaja dhe Australia janë shtete me ndikim të madh ndërkombëtar dhe janë konsideruar tradicionalisht aleatë të ngushtë të Izraelit. Megjithatë, ky veprim është një ndryshim i dukshëm në qëndrimet e këtyre vendeve ndaj konfliktit Izrael-Palestinë.
Presidenti i Autoritetit Palestinez, Mahmoud Abbas, tha se njohja e shtetit palestinez nga Britania është një hap drejt “një paqeje të drejtë dhe të qëndrueshme”, sipas një deklarate të lëshuar nga presidenca palestineze.
“Presidenti i Shtetit të Palestinës, Mahmoud Abbas, mirëpret njoftimin e njohjes së Shtetit të pavarur Palestinez nga Mbretëria e Bashkuar, duke deklaruar se ky është një hap i rëndësishëm dhe i nevojshëm drejt realizimit të një paqeje të drejtë dhe të qëndrueshme”, tha presidenca.
Abbas nuk u lejua të udhëtonte drejt SHBA ku ndodhet selia e OKB-së pasi autoritetet amerikane nuk i dhanë vizë. Ai do të flasë përmes një video në mbledhjen e javës së ardhshme.
