Në një epokë ku inovacioni dhe ndryshimi promovohen si virtyte, ka një numër gjithnjë në rritje njerëzish që gjejnë qetësi në të kundërtën: monotonia. Nuk është fjala për mërzi apo mungesë kreativiteti, por për një estetikë të re të përditshmërisë së qëndrueshme, ku zakonet e përsëritura kthehen në spirancë mendore.
Shprehja “estetika e monotonisë” po qarkullon gjithnjë e më shumë në komunitetet online, sidomos te të rinjtë që ndihen të rraskapitur nga përmbajtja e përhershme, nga presioni për t’u veçuar, për të ndërruar jetë, vend, stil, apo karrierë çdo muaj. Në vend të kësaj, ata i kthehen ritualeve të vogla dhe të përditshme:
– E njëjta filxhan kafeje çdo mëngjes,
– Ecja në të njëjtin park,
– Shkrimi në të njëjtin ditar në të njëjtën orë.
Një studim nga “Journal of Positive Psychology” zbuloi se:
Përsëritja e disa zakoneve të vogla çdo ditë ndikon pozitivisht në reduktimin e ankthit dhe rritjen e kënaqësisë në jetë, sepse trurit i pëlqejnë parashikueshmëria dhe siguria. Në fakt, këto rutina ndihmojnë në ruajtjen e vëmendjes, krijimin e strukturës psikologjike, dhe rrisin produktivitetin pa shkaktuar stres.
Rrjetet si TikTok dhe Instagram kanë sjellë edhe një trend vizual ku videot me tituj si “the same routine every day and I love it” janë kthyer në një fenomen. Pamje minimaliste të shtëpisë, ambientet e pastra, ndriçimi i mëngjesit në perde të gjitha shoqëruar me një muzikë të qetë, i japin kësaj monotonie një dimension estetik dhe emocional. Në vend që të shohim përsëritjen si diçka të bezdisshme, estetika e monotonisë na kujton se ritmi i ngadaltë, i qëndrueshëm dhe i njohur është një formë rezistence ndaj shpërqendrimit të botës moderne. Sepse ndonjëherë, ajo që duket “e njëjtë”, është pikërisht ajo që na mban në balancë.
