Çdo muaj, mjekët specialistë në vendin tonë do të marrin 50 mijë lekë plus pagës bazë, duke nisur nga 30 prilli i këtij viti. Kjo u bë e ditur sot nga kryeministri Edi Rama, i cili vuri në dukje se me këtë rritje, pagat e mjekëve specialistë pësojnë rritje krahasur me ato në vendet e Ballkanit dhe barazohen me të Serbisë.
Më 30 prill 2023, mjekët specialistë do të marrin 50 mijë lekë të reja plus në pagën e tyre ose 500 dollarë çdo muaj. Do të mbajmë zotimin për rritjen 7% të pagës për mjekët e përgjithshëm dhe infermierët. Në hyrje të 2024-ës do të kemi rritje edhe për mjekët e përgjithshëm e infermierët njësoj si me mjekët specialistë. Në prill, me pagën e specialistëve ngjitemi lart me pagat e rajonit dhe barazohemi me të Serbisë.
Kryeministri Rama foli në Kongresin e parë të Shëndetësisë, ku përmendi dhe problematikën e “eksodit” të bluzave të bardha.
Nuk do të lejohet më që mjekët e infermierët që shkollohen me paratë e taksapaguesve shqiptarë të shkojnë të punojnë në Gjermani sapo të marrin diplomën në dorë. Kjo problematikë do të adresohet që të marrë zgjidhjen e duhur. Eshtë një problem të cilin shumë vende e kanë adresuar dhe ne ka ardhur koha ta adresojmë.
Sot kemi një kapital njerëzor në fushën e shëndetësisë shumë më të qëndrueshëm e të mirëtrajtuar dhe pa diskutim shumë më garanci për të nesërmen. Ky kapital njerëzor ka nevojë për arsimim, punësim, kushte pune dhe pagë dinjitoze.
Edhe puna e bërë atje nga mjekët dhe infermierët ka krijuar një reputacion pozitiv, kjo është në nderin e mjekëve, por një problem më shumë për ne.
Kongresi i Parë i Shëndetësisë mbahet në Tiranë sot dhe nesër, duke zhvilluar punimet në Pallatin e Kongreseve. Ky Kongres synon të bëjë bashkë politikëbërës, profesionistë të Shëndetësisë, ekspertë, përfitues të shërbimeve dhe aktorë të tjerë për të ndarë përvojat dhe sfidat e këtij sektori.
