Aktorja e njohur Kaley Cuoco ka ndarë me fansat një lajm të gëzueshëm, duke zbuluar se është në pritje të fëmijës së saj të dytë me të fejuarin, aktorin Tom Pelphrey.
Ylli 40-vjeçar i serialit të famshëm “The Big Bang Theory” e bëri njoftimin përmes një postimi emocionues në Instagram, ku publikoi disa fotografi familjare që tregojnë barkun e rrumbullakosur të shtatzënisë.
Në një nga imazhet më të komentuara, Cuoco pozon pranë Pelphrey-t dhe vajzës së tyre, Matilda, teksa festojnë para një torte me ngjyra festive. Fotot zbuluan edhe një detaj të veçantë: çifti po pret një tjetër vajzë.
Po e kompletojmë familjen tonë të vogël, një ëndërr e bërë realitet
-shkroi aktorja në përshkrimin e postimit.
Ajo pranoi gjithashtu se kjo shtatzëni ka qenë më sfiduese se e para, por theksoi se ndihet jashtëzakonisht mirënjohëse për këtë moment të rëndësishëm në jetën e saj.
Ky udhëtim i dytë ka qenë pak më i vështirë në shumë aspekte, por jemi pafundësisht mirënjohës
-u shpreh Cuoco.
Edhe Tom Pelphrey reagoi me entuziazëm për lajmin, duke konfirmuar se familja e tyre do të zgjerohet me një tjetër vajzë.
Motra e vogël është rrugës! Baba i vajzave përgjithmonë
-shkroi ai me humor në rrjetet sociale.
Historia e dashurisë mes çiftit nisi në vitin 2022, kur ata u njohën përmes menaxherit të tyre të përbashkët. Marrëdhënia u bë publike vetëm pak javë më vonë dhe shpejt u kthye në një nga çiftet më të dashura të Hollywood-it.
Në gusht të vitit 2024, Cuoco dhe Pelphrey kurorëzuan lidhjen e tyre me fejesë, ndërsa tani po përgatiten për një tjetër kapitull të bukur në jetën familjare.
Me ardhjen e vogëlushes së dytë, duket se familja e Kaley Cuoco-s po bëhet pikërisht ashtu siç e kishte ëndërruar aktorja.
