Presidenti turk Rexhep Tajip Erdogan është takuar javën e kaluar në Stamboll me Donald Trump Jr., djalin e madh të presidentit amerikan, gjatë një vizite të paparalajmëruar, raportoi faqja e lajmeve Middle East Eye, duke cituar burime të afërta me zhvillimet.
Lajmi u bë publik për herë të parë të mërkurën nga lideri i opozitës turke, Ozgjur Ozel, kryetar i Partisë Popullore Republikane (CHP), i cili akuzoi Erdoganin për negociata të fshehta me Trump Jr. në lidhje me çështjen e Gazës.
“Në protokoll ai u shënua thjesht si ‘biznesmen’, pa përmendur emrin,” – tha Ozel gjatë një tubimi në Stamboll. “Ndërsa Palestina po gjakoset, ata merren me marrëveshje biznesi përmes djalit të Trump-it.”
Ozel shtoi gjithashtu se, ndërkohë që Erdogan kritikon publikisht kryeministrin izraelit Benjamin Netanyahu, nuk thotë asnjë fjalë për “sponsorin e vërtetë” të konfliktit, që sipas tij është Donald Trump.
Një burim i afërt me Erdoganin, që foli për Deutsche Welle, konfirmoi takimin me Donald Trump Jr., por e përshkroi atë si një “vizitë kortezie”, duke mohuar çdo diskutim zyrtar për Gazën apo ndonjë çështje tjetër specifike. Burimi e cilësoi si të pabazuara akuzat e liderit opozitar.
Edhe pse nuk mban një pozicion zyrtar në administratën e të atit, Trump Jr. konsiderohet si një figurë me ndikim të madh në rrethin e ngushtë të ish-presidentit, dhe aktualisht shërben si zëvendësdrejtor ekzekutiv i “Trump Organization”. Gjatë vizitës në Turqi, ai u shoqërua nga një grup biznesmenësh me qëndrime të afërta me të.
Kjo nuk është hera e parë që Donald Trump Jr. viziton Turqinë, në vitin 2016 ai zhvilloi takime të ndryshme investimi në Stamboll.
Ndërkohë, Erdogan ruan marrëdhënie të mira me Donald Trump, dhe burime turke i thanë Middle East Eye se presidenti turk synon një takim bilateral me Trump-in senior javën që vjen, në kuadër të Asamblesë së Përgjithshme të OKB-së. Tema të mundshme të diskutimit përfshijnë:
Blerjen e avionëve luftarakë F-16 dhe mundësinë për të rifituar akses në programin F-35
Çështjen e kurdëve sirianë dhe përfshirjen e tyre në qeverinë e Damaskut
Tensionet me Izraelin lidhur me Gazën dhe Sirinë
Burime nga rajoni konfirmojnë gjithashtu se Trump Jr. është udhëtar i rregullt në Lindjen e Mesme, duke përfshirë vizita në Riad dhe Doha, ku shpesh ka shoqëruar të atin në vizita zyrtare.
