Usher është bërë sërish kryefjalë në rrjetet sociale, por këtë herë jo vetëm për performancën e tij. Gjatë koncertit në Nashville, këngëtari krijoi një moment që u përhap me shpejtësi në internet, pasi vendosi të largonte nga skena një fanse që dukej qartë se nuk ndihej rehat.
Artisti 47-vjeçar, i cili po vazhdon turneun e tij koncertal, ftoi në skenë një fanse nga zona VIP, duke ndjekur traditën e performancave të tij, ku shpesh ndërvepron nga afër me publikun.
Teksa këndonte dhe kërcente pranë saj, Usher vuri re se fansja nuk po e shijonte momentin. Shprehja e saj në fytyrë dhe qëndrimi i rezervuar lanë të kuptohej se ajo ndihej në siklet.
Sapo e kuptoi situatën, këngëtari ndërpreu performancën dhe iu drejtua publikut me një koment të shkurtër.
Nuk mendoj se ajo dëshiron të jetë në skenë
-tha ai në mikrofon.
Menjëherë pas kësaj, Usher i bëri me mirësjellje shenjë fanses që të zbriste nga skena dhe të rikthehej në vendin e saj mes publikut, ndërsa koncerti vazhdoi normalisht.
Videoja e këtij momenti u bë shpejt virale në rrjetet sociale, duke nxitur reagime të shumta.
Shumë përdorues vlerësuan mënyrën se si artisti e menaxhoi situatën, duke respektuar faktin që fansja nuk ndihej komode dhe duke shmangur çdo presion të panevojshëm.
Nga ana tjetër, pati edhe nga ata që u habitën pse ajo kishte pranuar të ngjitej në skenë, duke qenë se performancat e Usherit njihen prej vitesh për ndërveprimin e afërt dhe spontan me fansat.
Pavarësisht debatit në internet, momenti u komentua gjerësisht si një shembull i mënyrës se si artisti reagoi me respekt ndaj ndjenjave të fanses, duke i dhënë përparësi mirëqenies së saj gjatë spektaklit.
