Përdoruesit e iPhone pretendojnë se përditësimi më i fundit i Apple iOS i bën pajisjet të papërdorshme. Megjithatë, ka një zgjidhje për këtë problem. Shumë nga përdoruesit pasi instaluan përditësimin iOS 17.4.1, u detyruan të kërkonin ndihmë nga profesionistët në dyqanet e Apple dhe ndanë përvojat e tyre. Një pronare e iPhone tha për Daily Mail se telefoni i saj u përditësua por ekrani nuk reagoi kur ajo u përpoq ta zhbllokonte.
Vetëm pasi ajo e çoi iPhone në një dyqan Apple për kontroll, pajisja filloi të funksiononte. “Punonjësi në dyqanin e Apple tha se përditësimi ka shumë të ngjarë të ketë ngecur, gjë që e bëri telefonin të mendojë se ishte ende duke u përditësuar dhe për këtë arsye nuk po përgjigjet”,-tha përdoruesja e iPhone.
Përditësimi më i fundit për modelet e iPhone, i quajtur iOS 17.4.1, ka dalë për përdoruesit që nga 21 marsi. Megjithatë, për të përmirësuar në softuerin më të fundit, iPhone duhet të ketë një sasi të caktuar baterie dhe të jetë i lidhur me WiFi, përndryshe sistemi do të përditësohet automatikisht. Mesa duket, ata që kanë pritur të shkarkojnë përditësimin janë prekur nga “bug” i përmendur.
Për të zgjidhur problemin, një punonjës i dyqanit Apple lidhi iPhone me një laptop dhe riinstaloi plotësisht iOS. Sipas reagimeve të shumta të përdoruesve në rrjetet sociale, kjo metodë funksionon edhe nëse tashmë keni të instaluar iOS 17.4.1 dhe përdoruesit në Reddit thonë se mund të bëhet në shtëpi. Një përdorues raporton se versioni i iOS 17.4.1 është i disponueshëm në iTunes, kurse Apple e ka lëshuar në heshtje. Ky version mund të shkarkohet duke lidhur iPhone me kompjuterin dhe duke shkarkuar përditësimin e iOS nga iTunes.
Kur Apple prezantoi iOS 17.4 në fillim të këtij muaji, ai solli shumë ndryshime në telefonat iPhone në Bashkimin Evropian ku Apple u detyrua të pajtohej me Aktin e Tregjeve Digjitale (DMA). Përditësimi i lejon përdoruesit e iPhone në BE të shkarkojnë aplikacione nga një palë e tretë dhe të zgjedhin një platformë pagese nga një palë e tretë në vend të Apple. Por, këto janë vetëm dy nga ndryshimet që ndodhën në BE me sistemin e ri operativ. Përditësimi shtoi gjithashtu edhe opsione të reja për ata që përdorin funksionin Stolen Device Protection i cili kërkon verifikimin e identitetit të pronarit për të lejuar ndryshime në telefon.
