Në terren, ekipet ukrainase të riparimit të avarive vazhdojnë përpjekjet për të rikthyer energjinë elektrike në miliona shtëpi të Ukrainës, pas sulmeve të fundit shkatërrimtare me raketa ruse në objektet e infrastrukturës, duke shënjestruar edhe pikat e furnizimit me energji e ujë të pijshëm. Presidenti i Ukrainës, Volodymyr Zelenskiy tha se më shumë se 6 milion familje mbeten në errësirë.
Ndërprerjet e energjisë elektrike vazhdojnë në shumicën e rajoneve, si dhe në kryeqytetin Kiev. Por, ekipet e riparimit kanë arritur të përgjysmojnë numrin e zonave të prekura që nga 23 nëntori, datë që shënon dhe një nga netët më shkatërruese të bombardimeve ruse ndaj infrastrukturës së rrjetit elektrik, përgjatë pushtimit 9-mujor.
Përveç kryeqytetit, Zelenskiy deklaroi se edhe Odesa në Detin e Zi, Lvivi në Ukrainën perëndimore, Vinnytsia e Dnipropetrovsk në Ukrainën qendrore janë të tjera zona të goditura rëndë.
Përmes Telegramit, kompania kombëtare e rrjetit të energjisë, Ukrenerho bëri të ditur se deri dje në orën 19:00, rreth 30 për qind e furnizimeve me energji elektrike të vendit, ende ishin jashtë funksionit. Ukrenerho njoftoi se po vazhdonte një punë të ndarë në faza dhe se ekipet e riparimit po punojnë gjatë gjithë kohës, por u bëri thirrje qytetarëve që të kursejnë energjinë elektrike. Kjo shton vështirësitë në kushtet e uljes së temperaturave.
Pushtimi rus i Ukrainës nisi në muajin shkurt të këtij viti. Javët e fundit, Ukraina ka arritur që të rikthejë nën kontroll disa qytete që ishin pushtuar nga trupat e Moskës.
Me ftesë të Gjermanisë, vendet e G7-ës mblidhen javën e ardhshme në kryeqytetin rumun Bukuresht. Në fokus, mbështetja për furnizim me energji elektrike për Ukrainën. Sulmet ajrore ruse në infrastrukturën ukrainase, kryediplomatja gjermane, Annalena Baerbock, i quajti “krim të patolerueshëm e çnjerëzor”.
Sekretari i Përgjithshëm i NATO-s, Jens Stoltenberg, u zotua se Aleanca Veri-Atlantike do të ndihmojë Ukrainën të mbrohet në luftën kundër Rusisë për aq kohë sa të ketë nevojë. Gjithashtu, tha se NATO do të ndihmojë vendin e shkatërruar nga lufta t’i transformojë forcat e armatosura në një ushtri moderne, sipas standardeve perëndimore.
