Martesat në Kinë ranë në nivelin më të ulët që nga fillimi i regjistrimeve në vitin 2022, duke vazhduar një rënie të vazhdueshme gjatë dekadës së fundit edhe pse totali i martesave mund të jetë prekur nga bllokimet e rrepta të COVID-19. Vetëm 6.83 milionë çifte përfunduan regjistrimin e martesës vitin e kaluar, treguan të dhënat e publikuara në faqen e Ministrisë së Çështjeve Civile, rreth 800,000 më pak se një vit më parë.
Rënia e numrit të martesave vjen pasi vendi po përballet me një rënie të numrit të lindjeve dhe popullsisë. Në vitin 2022, popullsia e Kinës ra për herë të parë në gjashtë dekada, një rënie që pritet të shënojë fillimin e një periudhe të gjatë rënieje të numrit të qytetarëve të saj me implikime të thella për ekonominë e saj dhe botën.
Shkalla e lindjeve në Kinë ra vitin e kaluar në 6.77 lindje për 1000 njerëz, më e ulëta në rekord, nga 7.52 në 2021. Për të inkurajuar martesën dhe për të rritur shkallën e ulët të lindjeve në vend, Kina tha muajin e kaluar se do të nisë projekte pilot në më shumë se 20 qytete për të krijuar një kulturë të martesës dhe të lindjes së fëmijëve “të epokës së re”.
Ndërkaq, në Shqipëri lindshmëria po shënon nivele gjithnjë e më të ulëta dhe që prej vitit 1990 lindjet janë tkurrur me 71%, në dekadën e fundit me 31% dhe në vitin 2022 shënuan një rënie me 13% krahasuar me vitin paraardhës, duke ju referuar të dhënave të INSTAT.
