Në qytetin Ningbo, në provincën Zhejiang të Kinës, mbi 2 mijë persona morën pjesë në një garë të pazakontë që u frymëzua nga kujtimet e jetës shkollore dhe shakatë e fëmijërisë. Eventi u organizua në një qendër tregtare dhe u kthye shpejt në një fenomen viral në rrjetet sociale kineze.
Gara u bazua në një koncept të thjeshtë: pjesëmarrësit duhet të hanin sa më shpejt një pjatë tradicionale me oriz dhe supë, pa u kapur nga “mësuesi” që i vëzhgonte gjatë gjithë kohës, duke rikrijuar atmosferën e një klase shkollore. Për këtë aktivitet, organizatorët kishin transformuar hyrjen e qendrës tregtare në një klasë të vërtetë, me banka të rreshtuara, një zile shkolle dhe një “mësues” që monitoronte garuesit.
Çdo raund zgjaste rreth 10 minuta, ndërsa pjesëmarrësit përpiqeshin të përfundonin ushqimin sa më shpejt dhe pa u vënë re. Rregullat ishin të thjeshta, por sfiduese: nëse një garues kapet duke ngrënë, ndëshkohet me 30 sekonda pauzë. Pas tre shkeljeve, përjashtohej nga gara. Për të shmangur penalizimet, shumë pjesëmarrës përdorën taktika kreative, si fshehja pas librave apo shtirja sikur po bënin diçka tjetër.
