Ariana Grande ka ngjallur diskutime pas një interviste të fundit, ku ka folur për personazhin e saj, Glinda, në filmin e ardhshëm “Wicked”. Gjatë bisedës me Gay Times, 31-vjeçarja sugjeroi se personazhi i saj mund të jetë “i fshehur në dollap”, duke iu referuar mundësisë së seksualitetit LGBTQ+ të Glindës.
Në intervistën që ndau me bashkë-yllin e saj Cynthia Erivo, 37 vjeçe, që luan Elphaba, Shtrigën e Ligë të Perëndimit, ato u pyetën për fansat që shpesh i interpretojnë dy personazhet si një çift romantik. Grande e pranoi me humor këtë mundësi, duke thënë:
Glinda mund të jetë duke u fshehur në dollap. Ju kurrë nuk e dini! Jepini edhe pak kohë.
Ajo vazhdoi të përshkruante botën e Oz-it si një “festim të veçantisë”, duke theksuar se gjithçka në këtë univers ka një element unik dhe të veçantë.
Çdo ditë në qytetin e Emerald është si një paradë krenarie… madje edhe pulat atje janë homoseksuale
Në anën tjetër, Cynthia Erivo ofroi një perspektivë më të thellë për marrëdhënien mes Elphabës dhe Glindës. Ajo tha se lidhja mes dy shtrigave është shumë speciale dhe e thellë, por nuk është domosdoshmërisht romantike.
Mendoj se Elfi e do Glindën. Nuk është një dashuri romantike, por është një lidhje e vërtetë dhe një dashuri të thellë që ata ndajnë
Grande e mbështeti këtë mendim, duke theksuar se marrëdhënia e tyre është një hapësirë e sigurt dhe plot mirëbesim, e bazuar në një dashuri që kapërcen seksualitetin dhe që fokusohet në sigurinë dhe mbështetje reciproke.
Kur u pyetën nga intervistuesi nëse të gjithë personazhet në Oz mund të konsiderohen si pjesë e komunitetit LGBTQ+, të dyja aktoret u përgjigjën me një “po” të qeshur, duke i dhënë një ton të lehtë bisedës.
Megjithatë, komentet e Grande kanë shkaktuar disa reagime kritike nga fansat. Disa prej tyre e interpretuan komentin e saj për Glindën si një përpjekje për të përfituar nga narrativa ‘queer’ pa e trajtuar në mënyrë të thellë dhe serioze si pjesë të historisë. Ata u shprehën të shqetësuar për mënyrën se si seksualiteti i personazheve mund të përdoret si një element i thjeshtë, pa e zhvilluar atë si pjesë integrale të karaktereve dhe rrëfimit.
Filmi “Wicked”, i bazuar në muzikalin e famshëm të Broadway-t, do të shfaqet në kinema në vitin 2024 dhe pritet të sjellë një version të ri të njohur të historisë nga Toka e Oz-it.
Kjo përshtatje ka ngjallur shumë pritshmëri nga adhuruesit e historisë origjinale dhe muzikalit, si dhe nga ata që janë të interesuar për trajtimin e temave të diversitetit dhe përfaqësimit në kinematografi.
