Aktorja amerikane Ariel Winter, e njohur për rolin e saj si Alex Dunphy në serialin e suksesshëm “Modern Family”, ka folur për herë të parë me sinqeritet tronditës mbi abuzimin dhe presionin që ka përjetuar që në fëmijëri gjatë karrierës në Hollywood.
Në një intervistë të fundit për “DailyMail”, 26-vjeçarja rrëfeu se, duke qenë pjesë e industrisë që në moshën 4-vjeçare, u ekspozua shumë herët ndaj sjelljeve të papërshtatshme nga burra më të mëdhenj që i dërgonin mesazhe të frikshme.
Jam njohur që në fëmijëri me grabitqarët meshkuj. Kur fillova të përdorja një laptop apo celular, mesazhet filluan të vinin. Ishte traumatike
-u shpreh ajo, duke refuzuar të zbulojë më shumë detaje.
Winter theksoi se pjesa më e errët e përvojës së saj nuk ndodhte vetëm pas kamerave, por edhe përmes syrit të opinionit publik.
Adoleshenca e saj u kthye në objekt analizash dhe kritikash për pamjen fizike, gjë që ndikoi thellë në shëndetin e saj mendor.
Kur isha 14 vjeçe, trupi im ishte temë kryesore në media. Çdo titull, çdo koment, fliste për mënyrën se si dukesha. Ishte e tmerrshme dhe shkatërruese për vetëbesimin tim
Aktorja zbuloi se gjatë gjimnazit iu desh të përdorte medikamente kundër depresionit për të përballuar gjendjen emocionale.
Këto ilaçe sollën ndryshime të dukshme në trupin e saj, duke e bërë edhe më të vështirë ballafaqimin me kritikat publike.
Pavarësisht gjithçkaje, Ariel Winter mbetet një zë i fuqishëm për mbrojtjen e të rinjve në industrinë e filmit dhe një shembull guximi për të folur hapur mbi përvojat që shumë të tjerë zgjedhin t’i mbajnë të heshtura.
