Sot në Bruksel mbahet Konferenca e pestë Ndërqeveritare për anëtarësimin e Shqipërisë në Bashkimin Europian. Kjo konferencë do të shërbejë për të hapur negociatat me Shqipërinë mbi grup-kapitullin 3 “Konkurrueshmëria dhe rritja gjithëpërfshirëse”, i cili përfshin:
Kapitullin 10 – Transformimi digjital dhe media
Kapitullin 16 – Taksat
Kapitullin 17 – Politika ekonomike dhe monetare
Kapitullin 19 – Politika sociale dhe punësimi
Kapitullin 20 – Politika për ndërmarrjet dhe industrinë
Kapitullin 25 – Shkenca dhe kërkimi
Kapitullin 26 – Arsimi dhe kultura
Kapitullin 29 – Bashkimi doganor
Më 24 mars të vitit 2020, ministrat për Çështjet Evropiane dhanë miratimin politik për hapjen e negociatave me Shqipërinë dhe Maqedoninë e Veriut. Ky vendim u miratua me procedurë të shkruar dhe u mbështet nga Këshilli Evropian.
Më 19 korrik 2022 u mbajt Konferenca e parë Ndërqeveritare Shqipëri-BE, që shënoi zyrtarisht hapjen e negociatave me Shqipërinë.
Më 15 tetor 2024 u zhvillua Konferenca e dytë, ku u hapën negociatat për Grup-kapitullin 1 – Themelorët.
Më 17 dhjetor 2024, Konferenca e tretë, ku u hapën negociatat për Grup-kapitullin 6 – Marrëdhëniet e jashtme.
Më 14 prill 2025 u mbajt Konferenca e katërt, e cila u fokusua në Grup-kapitullin 2 – Tregu i brendshëm dhe ku Bashkimi Europian vendosi gjithashtu kriteret për mbylljen e përkohshme të kapitujve të këtij grupi.
