Justin Bieber u ngjit në skenë gjatë ceremonisë së finales së Kupës së Botës FIFA 2026 në stadiumin MetLife në New Jersey, por performanca e tij nuk u prit njësoj nga publiku.
Këngëtari kanadez interpretoi një version të veçantë të këngës “Everything Hallelujah” nga albumi i tij më i fundit, “Swag”, duke qenë një nga emrat kryesorë të spektaklit muzikor që shoqëroi finalen mes Spanjës dhe Argjentinës.
Megjithatë, ndryshe nga energjia që karakterizoi performancat e artistëve të tjerë, interpretimi i Bieberit ngjalli reagime të shumta në rrjetet sociale, ku shumë shikues e konsideruan zgjedhjen e këngës të papërshtatshme për atmosferën festive të finales.
Komentet kritike nuk munguan. Disa përdorues shkruan: “A po luante vërtet kitarë apo vetëm po bënte sikur?”, “Kjo ishte një ninullë”, “Performanca më e dobët e mbrëmjes”, “Kjo nuk ishte ajo që prisnim” dhe “Pse të këndosh një këngë kaq të qetë në finalen e Kupës së Botës?”.
Shumë fansa argumentuan se publiku priste një performancë më dinamike dhe me ritëm, në përputhje me emocionet e një prej ngjarjeve më të mëdha sportive në botë.
Në kontrast, Shakira, e cila gjithashtu performoi gjatë ceremonisë, u vlerësua për energjinë dhe spektaklin që solli në skenë, duke marrë reagime kryesisht pozitive nga publiku.
Megjithatë, performanca e Bieberit nuk u kritikua nga të gjithë. Një pjesë e fansave e mbrojtën artistin, duke vlerësuar interpretimin emocional dhe vokalin e tij, ndërsa theksuan se ai kishte zgjedhur të prezantohej me një anë më personale dhe artistike.
Pavarësisht reagimeve të ndara, performanca e Justin Bieber u bë një nga momentet më tëdiskutuara të finales së Kupës së Botës, duke ndezur debat mes atyre që e vlerësuan ndjeshmërinë e interpretimit dhe atyre që menduan se një event i tillë kërkonte një spektakël shumë më energjik.
